WALA pa matapus ang usa ka buwan nga implementasyon sa ‘enhanced community quarantine’ (ECQ) o lockdown sa Luzon. Kon wala ako masayop, karong Abril 12 pa matapus. Dinhi sa ato, mao pay pagsugod ug molanat pa og usa ka buwan. Gituyo kini aron mahipos gyud ang mga tawo sa ilang mga panimalay ug dili na mokuyanap ang gikalisangang coronavirus disease (Covid-19).
Aduna nay debate karon tali sa mga miyembro sa Inter-Agency Task Force for the Management of Emerging Infectious Disease (IATF) kon angay na ba kining libkason human sa usa ka buwan nga implementasyon. Ang desisyon unya sa Presidente mag-agad sa rekomendasyon sa task force kay sila man ang eksperto sa situwasyon.
Ang unang pangutana. Na-kontrol na ba ang pagkuyanap sa virus? Dili na ba kini mokatap kon mobalik kita sa normal natong panginabuhi? Unsa man ang resulta sa usa ka buwan nga lockdown sa natad sa ekonomiya, trabaho ug patigayon? Makasustiner ba kaha ang kagamhanan sa panginahanglan sa katawhan labi pa kadtong derektang naapektuhan sa lockdown?
Ang World Health Organization (WHO) miwarning sa kagamhanan kabahin sa plano paglibkas og sayo sa ECQ o lockdown. Si WHO Western Pacific regional director Takeshi Kasai nagkanayon nga kinahanglan estudyuhan og maayo sa kagamhanan sa Pilipinas ang plano sa paglibkas sa ECQ niining panahona. Ang experts nagkanayon nga mas mograbe pa ang pagkuyanap kon ihunong ang lockdown. Kini gumikan kay dili naman ma-obserbar ang social distancing.
Ang mga pampublikong sakyanan mobalik sa normal nga operasyon ingon man usab ang mga establisemento sama sa malls ug restaurants ug uban pa. Matod pa sa mga expert nga wala pa sa kinatumyan ang gidaghanon sa mga natakbuyan ug nangamatay.
So, unsa may atong palabihon nga mosaka og maayo kining maong balatian o ang ekonomikanhong resulta niini ngadto katawhan? Silang mga lider sa atong nasud ang mohukom. Kon sa titulo pa ni sa drama sa radyo, makapangutana kita: hangtod asa ug kanus-a? (bobbygnalzaro@gmail.com)