KON moulbo ang kagubot sa pag-apod-apod og pagkaong hinabang ug mahulga ang ilang kinabuhi, ang kapulisan mahimong mopusil patay sa mga nagmugna sa kagubot.
Mao ni ang mando niadtong Miyerkules sa gabii, Abril 1, ni Presidente Rodrigo Duterte, kinsa klarong nasuko sa mga taho sa protestang gipasiugdahan sa 100 ka mga residente sa Barangay Bagong Pag-asa sa Quezon City niadtong Miyerkules sa buntag.
“I will not hesitate. My orders are - sa pulis pati military pati mga barangay - na pagka ginulo at nagkaroon ng okasyon na lumaban at ang buhay ninyo ay malagay sa alanganin, shoot them dead,” matod sa Presidente sa gabii na kaayo niyang pagpamulong sa nasod kalabot sa coronavirus disease (Covid-19) outbreak.
Gibasol ni Duterte ang mga walhon sa riot diin 20 ka mga tawo ang nadakpan.
Nihangyo si Quezon City Mayor Joy Belmonte sa kapulisan nga sila buhian.
Apan, ang Presidente niingon nga di sila buhian aron magsilbeng ehemplo niadtong manghagit sa kagamhanan, manggubot ug mopasiugdag riot.
“We are ready for you - gulo o barilan o patayan. I will not hesitate. My soldiers will shoot you. I will not hesitate to order the police to arrest and detain you,” matod sa Presidente.
“H’wag n’yo akong takutin ng gulo-gulo kasi kung gusto talaga ninyo ng gulo, guguluhin natin ang bayan natin, tutal wala pa namang pagkain,” siya nidugang.
DSWD na
Iya na usab nga gitahas ang pagpang-apod-apod sa cash ug hinabang nga pagkaon gikan sa mga “pulitiko” ngadto sa Department of Social Welfare and Development (DSWD).
Ubos sa social amelioration program sa kagamhanan nga giaprobahan sa Kongreso, ang 18 milyunes nga low-income nga mga pamilya makadawat og P5,000 ngadto sa P8,000 nga binuwan nga subsidy sud sa duha ka mga buwan aron makalahutay sila sa dautang epekto sa Covid-19 outbreak.
Gimandoan ni Duterte ang DSWD sa pagdali sa distribution sa humay ug ubang mga pagkaon.
Iyang gimandoan ang mga nalambigit sa pagpamutos sa relief goods ug manghatag og kwarta sa pagpanikas ug pagpangurakot.
“H’wag ninyong kaltasan, h’wag ninyong kunan,” siya nagkanayon.
Iyang giawhag ang mga benepisaryo sa paghuwat.
“Ang pera, dadating. Ang pagkain, dadating. H’wag lang kayong magulo para smooth (ang distribution)...Do not intimidate government. Do not challenge government. Matatalo kayo. Sigurado,” matod sa Presidente.
“Magtiis na lang kayo ng delayed delivery, pero dadating ‘yan at hindi ka magugutom. Hindi ka mamatay sa gutom,” siya nidugang.
Iya usab nga gimandoan ang kapulisan sa pagpatrolya aron mapugngan ang pagpangatake ngadto sa healthcare workers.
“Kung mahuli mo, kung ano ‘yong binubuhos niya doon sa health worker o sa doctor, ibuhos mo rin sa kanya para tabla,” dugang ni Duterte.
Ipaimbestigar si Leni
Usa ka commissioner sa Presidential Anti-Corruption Commission (PACC) sa Huwebes, Abril 2, niawhag sa National Bureau of Investigation (NBI) sa pag-imbestigar kang Vice President Maria Leonor “Leni” Robredo tungod sa giingong pag-solicit ug pagpakigkompetensya sa mga paninguha sa kagamhanan sa pagkombate batok sa coronavirus disease (Covid-19) outbreak.
Laing PACC commissioner, hinuon, daling niklaro nga ang panawagan ni PACC Commissioner Manuelito Luna iyang “personal opinion” wa magdala sa sintemyento sa commission.
Sa usa ka pamahayag nga giluwatan sa Huwebes, si Luna niingon nga ang mga lakang sa bise presidente gituyo aron magpahuyang sa paninguha sa kagamhanan sa pagkombate sa Covid-19 outbreak.
“The National Bureau of Investigation should investigate Vice-President Leni Robredo for illegal solicitations, actions that compete with, or calculated to undermine, national government efforts in this time of public health emergency or national calamities, such as OVP’s free shuttle service and dormitories for health workers, and PPEs for health workers,” matod ni Luna said.
Si PACC Commissioner Greco Belgica, sa laing pamahayag, niingon nga ang commission “not asking anyone to investigate VP Leni Robredo”.
“This is not the time for politicking. We are not concerned with any personality. Our main concern is to make sure all the needy Filipinos get all the help they need the President promised. Our concern is to end this Covid-19 (outbreak),” Belgica said.
Si Robredo wa pa makatubag.
Ang Office of the Vice President mao ang unang nakalusad og free shuttle services sa Metro Manila alang sa healthcare workers, essential personnel ug ubang mga tawo nga gikinahanglang mobiyahe sa Metro Manila bisan sa deklarasyon sa enhanced community quarantine. (MVI, JTM, REV)