Kaso sa sunog minus na

WA NAY natala nga sunog, bisan pa grass fire, sukad nga gipatuman ang mga 24 oras nga curfew ug labaw na sa dihang gipatuman ang enhanced community quarantine. Usa kini sa namatikdan sa taga Bureau of Fire Protection sa Dakbayan sa Talisay samtang sila nag-disinfect sa nagkadaiyang lugar sa Talisay City kaduha matag adlaw.

Ang maong obserbasyon, susama usab sa ubang bahin sa Central Visayas, tug-an ni Fire Senior Insp. Arra Alpajaro, pangu sa kabomberohan sa Dakbayan sa Talisay.

Niadtong Martes, Marso 31, nahuman ang pag-obserbar sa Fire Prevention month diin sagad daghan silang alarmahan nga sunog.

Apan gitug-an usab ni Alapajaro nga 100 porsyento gihapon sila nga alerto batok sunog.

Ug ang lain usab nga ilang gika-busyhan karon ang pagtabang sa gubat batok sa Covid 19.

Kay sila sa mga bombero ang frontline diha sa pag-disinfect ug paghimo’g flashing sa mga nagkadaiya nga lugar, ilabi na sa mga lugar nga dagsaon og mga tawo.

Sagad sa ilang punterya ang mga lugar diin nahimutang ang merkado, supermarkets, pharmacy, banko ug uban pa.

Nihimo sila niini kaduha kada adlaw.

Usa usab sila sa nidugang sa pwersa sa kapulisan diha sa quarantine control point.

Sama sa mga pulis ug taga disaster team, wala na usab silay uliay sa ilang mga pamilya, pagsiguro nalang nga dili sila makatakud o sila ba ang matakdan, simbako adunay mataptan sa Corona virus. (BBT)