Moisig-isig sa mga frontliners mabilanggo

ILIGAL na ang pagpinig o pag-discriminate sa mga health workers ug ubang frontliners sa Cebu City.

Kini human gipasar sa Cebu City Council ang ordinansa nga “The Frontliners Protection Ordinance of Cebu City” niadtong Abril 1, 2020.

Ang ordinansa, kon moepekto na, nagtangag og mga multa ug silot nga pagkabilanggo ni bisan kinsang mamatud-an nga sad-an sa korte.

Ang ordinansa gipangamahann ni Cebu City Councilor Dave Tumulak aron pagpanalipod sa frontliners nga nakasinati og diskriminasyon karong panahon sa coronavirus disease (Covid-19) pandemic.

Ang ordinansa nagbungat og multa nga P1,000 alang sa unang paglapas sa balaod, P3,000 sa ikaduha ug P5,000 sa ikatulo. Pwede usab nga mapriso og usa ngadto sa 30 ka adlaw ang mga makalapas sa balaod magdepende sa desisyon sa korte.

“The Department of Health (DOH) has received various reports regarding discrimination against the frontliners such as being refused from basic services like public transport and laundry services, refused entry to supermarket or grocery stores, or being evicted from their lodging houses and apartments due to the fear of contamination,” ingon ni Tumulak.

Ubos sa Seksyon 3 sa mao nga ordinansa, ang mga frontliners di angay babagan pag-access sa mga programa ug serbisyo nga alang sa publiko; pagbalibad o pagpahawa sa merkado, supermarkets, groceries, bakeshop, ug convenience stores; di pagpasulod o pagpahawa sa ilang mga puluy-anan sama sa lodging house, apartment, motel, hotel, inn dormitory ug uban pa.

Iligal usab ang di pagpasulod kanila sa mga pampubliko ug pribadong establisemento, pasilidad, utilities, transportation services nga para unta sa publiko.

Iligal sad ang pagpost og “slanderous or abusive” nga mga statements nga magpinig sa mga frontliners; pag-harass kanila pinaagi sa pisikal, mental, ug verbal nga pagpanghadlok, violence, intimidation o bisan unsang pagpanghulga; o bisan unsang klase nga diskriminasyon nga makaapekto sa human ug legal rights ug basic freedom sa mga frontliners.

Ang ordinansa naglakip sa tanang frontliners sama sa mga doktor, nurses, ug uban pang medical personnel ug health volunteers sa mga pribado ug gobyernong hospital; trabahante sa mga hospital apil na ang administrative staff, janitors ug security personnel; mga opisyales ug trabahante sa nasyonal ug lokal nga gobyerno nga adunay frontline functions; miyembro sa Philippine National Police (PNP) ug Armed Forces of the Philippines (AFP) ug uban pang law enforcers; mga sakop sa Philippine Red Cross, Bureau of Fire Protection (BFP), Disaster Risk Reduction and Management Office and Barangay Health Emergency Response Team (BHERT); ug uban pang empleyado sa mga establisymento nga naghatag og “essential services” sama sa funeral parlors ug medical supplies manufacturers.

Ang ordinansa moepekto 15 ka adlaw human masuwat kini sa mantalaan. (JJL)