GIPASALIG ni Mayor Oscar Moreno sa katawhan nga andam ang dakbayan ang Cagayan de Oro ug gihimo na niini ang tanan aron nga matubag ang panginahanglanon sa katawhan ning pakigbatok sa coronavirus disease 2019 (Covid-19).
Nasayran nga gi-kwestiyon ni Konsehal Jocelyn Rodriguez kung asa na ang calamity fund sa dakbayan ug nganong dugay natunol ang ayuda sa nagkadaiyang dapit sa siyudad.
Gibutyag ni Moreno nga palig-unon ang kapasidad sa lokal nga level aron nga ang ayuda sa nasudnong buhatan mapaabot gyud sa mga angayang makabenepisyo niini.
“Atong i-strengthen ang atong capacity sa local level para kanang download sa national level atong mapaabot sa intended beneficiaries,” dugang pa.
Gisiguro usab ni Moreno nga andam ang dakbayan ug naglihok alang na usab sa kaayohan sa tanan.
“I want to assure the people of Cagayan de Oro that we are responding, in fact we are ready. We have prepared ourselves thoroughly and kalooy sa Diyos okay man ang atong anticipations,” matud ni Moreno.
Giingong anaa na sa P28 milyones ang nagamit nga pundo alang sa mga food assistance sa nagkadaiyang dapit sa siyudad.