NAKAREKOBER na ang usa sa unom ka mga pasyente nga nagpositibo sa coronavirus disease 2019 (Covid-19) ug nakagawas na sa Northern Mindanao Medical Center (NMMC) niadtong Abril 1, 2020.
Ang maong pasyente nag-edad og 66 anyos nga babaye kinsa nagnegatibo na niadtong Marso 29 ang gikonsiderang “recovered” nga pasyente.
Gikabutyag ni Dr. Jose Chan, Medical Director sa NMMC nga naulian na ang maong pasyente.
“Katong naulian na ningpauli na considered to siya nga recovered, 66 years old nga ningpauli na nibalik na sa iyang panimalay,” matud ni Chan.
Nasayran nga gi-endorsar na kini sa City Health office ug sa Regional Epidemiology Unit kini human nigamit og address sa dakbayan apan taga Lanao del Sur.
Samtang naglaom ang kadagkoan sa Northern Mindanao Medical Center (NMMC) nga mamahimong negatibo na ang resulta sa tulo ka mga nahabiling kumpirmado nga positibo kaniadto coronavirus disease (Covid-19).
Nasayran nga ang nahisgutang tulo ka mga pasyente ang kasamtangang anaa pa sa maong ospital apan gikabutyag nga “recovering” na kini ug nanghinaot nga sa pag-usab sa ilang swab sample mamahong negatibo na ang resulta.
Gibutyag ni Chan nga nagpaalim pa ang maong mga pasyente ug kasamtangang medyo arang-arang na ang kahimtang ug nagpaabot sa ilang resulta.
Gidugang pa niini nga kini nga mga pasyente wala man kini sila’y mga major o delekado nga gibati sa pagsulod sa ospital gawas lang sa nakasinati og hilanat, ubo, ug diarrhea.
“Recovering ni sila karon naghulat pa kita sa resulta sa pag repeat sa ilang throat swab,” matud ni Chan.
Kasamtangang tulo na lang ka mga pasyente ang nahabilin karong panahona sa NMMC. Nagpasalamat usab kini nga sulod sa 24 ka oras walay na-admit nga pasyente sa maong ospital.