NAGBUY-OD ug naligo sa iyang kaugalingon nga dugo ang usa ka babaye human giluba kaganina sa alas 5:20 sa kadlawon sulod sa puloy-anan niini sa Barangay Dicklum, Manolo Fortich, Bukidnon.
Giila ang biktima nga mao si Gondit Cabanday, 33, minyo, residente sa susamang dapit.
Si Police Major Noel Flores Cano hepe sa Manolo Fortich Police Station nibutyag sa SunStar Superbalita nga nadala pa sa ospital ang biktima apan dead on arrival human nakaangkon og 11 ka samad sa nagkadaiyang parte sa lawas.
Basi sa imbestigasyon nadiskubre sa anak niini nga nahulog na gikan sa gihigdaan nga katre ang biktima ug nagkadugo.
Adunay mga person of interest nga gilantaw sa kapulisan ug giimbestigahan apan di pa manganlan karong panahona.
Gituohang personal nga away ang motibo gumikan kay wala man usab nawala nga kabtangan gikan sa biktima.