NAGPABILIN nga walay kaso sa Covid-19 sa Misamis Oriental as of April 1, 2020, basi sa kumpirmasyon ni Misamis Oriental Governor Bambi Emano.
Ang walo ka mga patient under investigation (PUIs) karon ang kasamtangan nga nag-home quarantine samtang adunay persons under monitoring (PUMs) nga moabot 1,737 nga anaa gihapon sa ilang tagsa ka balay.
Gi-monitor usab kini sa mga health officer sa ilang mga barangay.
Dugang ni Emano sa SunStar Superbalita nga nakapangandam og maayo ang mga mayor sa kalungsoran dihang sayo niya gideklarar ang State of calamity maoy rason wala kaayo pagsaka sa kaso sa MisOr karon panahona.
“Tungod sa atong sayo nga pagdeklarar sa State of Calamity ang atong mga mayor nakapagawas sa ilang disater funds ug nakalihok unsaon nga mapugngan kini nga virus nga makasulod sa atong lalawigan,” matud ni Emano.
Apan matud niini nga kung mag grabe kini nga krisis sa panglawas gimandoan na ang tanan mayor sa kalungsoran nga kinahanglan adunay isolation area sa matag lungsod ug kung adunay mograbe ang pasyente i-refer deretso sa NMMC nga kinahanglan nakasubay sa health protocols.
Hangyo niini sa Misamisnon nga magpuyo sa ilang tagsatagsa ka panimalay kay kung naay mga pangutana o ayuda gikan sa LGU ang mga opisyal na sa barangay ang mag house to house kanila.
Dugang ni Emano nga hagit karon sa mga mayores kining programa ni Presidente Rodrigo Duterte nga Social Amelioration program kay daw daghan na katawhan sige og pangutana kalabot niining ilang madawatan.
Apan pagklaro ni Emano nga sa pagkakaron wala pa na download ang Social Amelioration Program alang sa lalawigan apan makalaom ang katawhan nga kwalipikado sa programa ni Presidente Rodrigo Duterte nga makaabot kini sa ilang mga kamot tungod kay alang kini kanila basta mosubay lang sa mga gabayan nga gipangayo sa gitahasan nga ahensya sama Department of Social Welfare and Development (DSWD).