NIABOT na og P8 bilyones ang kadaot sa agrikultura sa Pilipinas tungod sa grabing kainit mugna sa El Nino. Tungod niini, makapaabot ta sa pagminos sa supply ug ang pagsaka sa presyo.
Kini mosamot og duot sa kalisod sa pagpuyo sa hut-ong sa mga kabus nga dugay nang napasagdan sa gobyerno.Karon saba kaayo sila sa pagpahibawo sa solusyon sa problema sa kainit apan way epek.
Kutob lang sila sa sulti ug wa sa buhat. Tan-awa ang makaluoy nga kahimtang sa mga mag-uuma maoy nangitag pamaagi nga mabuhi ang ilang pananom ug mga kahayupan taliwa sa grabing kainit.
Maayo tingaleg ang buhat ang ilang pasultion ug dili ang sulti maoy pabuhaton. Kon duna man silay solusyon, nganong waman nila i-implementar?Kini nagpakita sa ilang ka-iresponsable nga nahibawo naman unta silang daan kun kanus-a magsugod ang buwan sa ting-init!
GITANGTANG SI OAMINAL
Sayang kay tarong ug matinud-anon sa iyang katungdanan si Dangerous Drugs Board Undersecretary Atty. Paul Clarence Oaminal sa kampanya sa problema sa illegal nga drugas.
Ang uwahing kalampusan ni Oaminal mao ang pagsakmit sa binultong cocaine. Pait, inay pasidunggan gitangtang na hinuon sa katungdanan basi sa kamandoan ni Pres. Gloria M. Arroyo.
Duda lang ta kon asa nakapusta ang pangulo sa nasud? Ang problema sa drugas seryuso ug di angayang kakompiyansaan. Ang Pilipinas gikonsidera nga usa sa mga drug haven sa Asia. Gani sa miaging adlaw tuneladang cocaine ang nasakmit sa mga awtoridad.
Sa akong kasayuran nga nakuha niabot na og P6 milyunes ka mga tawo ang biktima sa drugas.Kun magpadayon kini nga way namonoan nga magpakabana kay toa makapusta sa sindikato, unsa naman lay ugma sa atong mga anak?
SA TUBURAN
Gipasanginlan ang kagamhanan ni Mayor Boyet Suezo sa lungsod sa Tuburan nga maoy nagpaluyo sa kalihukan sa illegal nga drugas. Aron mawagtang ang mga pagduda, ang mayor mismo maoy mangunay sa kampanya ug di niya pasagdan.
Ang mga tawo nga anaa sa iyang kiliran gikinahanglan nga iyang patiran aron adto mapunta sa prisuhan ug di angayang duphan.Tiaw moy dihay nadakpan nga bata sa mayor ang nahimong gawasnon.
Usa ni sa hinungdan nganong mialsa ang mga tawo sa Tuburan ug gusto na nilang ilisan ang namonoan.
(efren_lonzon@yahoo.com)