SUKWAHI sa maayong pamatasan ug responsibilidad isip piniling opisyal, ang pagbiya ni Mayor Soc Fernandez sa biktima sa kontra sa aksidente sa sakyanan nagpakita sa iyang pagka insensitibo sa pagbati sa ubang tawo.
Sayop o di ang pikas nga habig sa hitabo apan, kon may kinabuhi ang maapektohan, unahon gyud kini sa pag-atiman sa dili magdebate kon si kinsa ang sad-an sa trahedya sa trapiko.
Di ba usa kini kaakohan sa usa ka Kristiyano? Di ba si Mayor Fernandez nahimong inila sa iyang pagka Catholic faith defender?
Ang Toyota Revo nga gisakyanan ni Mayor Fernandez nakabangga og usa ka motorsiklo sa usa ka eskina sa South Coastal Road sa miaging adlaw.
Gikataho nga samdan ang motorista nga usa ka Colin Labrado, apan sumala sa taho, usa ka drayber sa traysikad na maoy nitabang sa biktima ug nidala ngadto sa labing duol nga ospital.
Hinuon, wa kita masayod kon unsay hunahuna sa mayor niadtong tungora - nasurprisa ba kaha sa kalit nga hitabo busa wa makabalanse sa iyang aksyon o nagdali lang ba kaha tungod sa mas importanteng kalihokan.
Dugang sa taho, ang mayor ug ang iyang kontrobersyal nga anak nakita sa ospital aron pagpakita sa suporta sa biktima.
Apan ang unang reaksyon ni Mayor Fernandez maayong mapasabot niya sa publiko nga nagpili niya nga lider sa dakbayan sa Talisay, ilabi na taliwa sa mga alegasyon nga insensitibo siya sa pagbati sa ubang tawo sa pagdepensa sa mga kaso sa iyang kontrobersyal nga sinagop nga si Joavan.
Maayo kaha mayor?