DUHA ka mga lalakeng managhigala nga nibakasyon sa lungsod sa Argao, habagatang Sugbo, aron paglikay sa enhanced community quarantine nangamatay human rakraki sa nagbinugtong gunman niadtong Huwebes, alas 7:30 sa gabii sa Alambijud, bukirang barangay sa lungsod.
Ang duha nagkalingaw og text sa ilang tagsa nila ka pamilya samtang naglingkod sa lingkuranang kawayan dihang niabot ang gunman nga armado og M16 Armalite rifle, ningrakrak kanila ni Renato Sotto Evangelista ug Dexter Ronamo.
Nangamatay diha-diha silang duha tungod sa mga samad pinusilan.
Si Evangelista usa ka delivery driver, taga Brgy. Labogon, Dakbayan sa Mandaue samtang si Ronamo, taga Loboc, Bohol, nang-apply pagka deliver driver.
Si P/Staff Sgt. Roy Repolidon, sa Argao Police Station, nga nahinabi sa dySS Super Radyo Cebu, nihulagway sa gunman base sa sulti sa mga saksi nga usa ka wa mailhing lalaki nga bonnet ang mirakrak sa mga biktima.
Matod ni Repolidon nga nalingaw nga na text sila si Evangelista ug Ronamo uban sa laing mga lumolupyo dihang sa nibutho ang gunman ug namusil.
Human sa pagpamusil yano lang nga nagbaktas sa karsada ang gunman.
Matod ni Repolido nga human gipatuman ang ECQ, sila si Ronamo ug Evangelista mibakasyon sa ilang mga kabanay sa lungsud sa Argao.
Persons of interest
Aduna nay gitan-aw nga mga persons of interest ang kapulisan sa probinsya sa Sugbo.
Wa pa mohatag sa kompletong detalye ang kapulisan sa Argao kon kinsa ang mga person of interest nga ipatawag aron imbestigahon.
Matod ni Police Colonel Roderick Mariano, hepe sa Cebu Police Provincial Office nga personal baingi ang gitan-aw nga motibo sa krimen tungod kay nganong sa kadaghan sa nanglingkod, sila lang duha ang gipamusil.
“Baka personal grudge ang tinitingnan nga chief of police kase bakit sa among duon sa limang tao bakit silang dalawa lang yung binaril bakit hindi yung mga kasamahan,” matod ni Mariano.
PUM
Giangkon usab niya nga gipaubos ang duha sa person under monitoring (PUM) tungod kay gikan sila sa dakbayan sa Mandaue nga adunay nagpositibo sa coronavirus disease (Covid-19). Apan wala kini magpasabot nga carrier na ang duha sa maong sakit.
Si Police Brigadier General Albert Ignatius Ferro mimando usab sa Criminal Investigation and Detection Group 7 nga moabag sa imbestigasyon nganong gipamatay ang duha.
Magpaabot pa siya sa investigation report gikan sa CPPO aron magsugod usab sa pakisusi ang Police Regional Office 7.