MOHUKOM karong semanaha o kaha sunod nang semana ang korte kon ipadayon ba ang plebisito sa bag-ong tukoron nga Barangay Banawa-Englis gikan sa Barangay Guadalupe, dakbayan sa Sugbo.

Nahurot nag presentar sa husay kagahapon ngadto sa sala ni Regional Trial Court (RTC) Judge Gabriel Ingles kagahapon ang ebidensya gikan sa duha ka mga habig may labot sa isyo.

Si Ingles namahayag nga iyaha nang resolbahon ang kabahin sa napakanaog niyang temporary restraining order (TRO) nga nagpugong nga mapahigayon ang plebisito niadtong Marso 13.Nihisgot ang huwes nga hayan karong semanaha o kaha sunod semana siya mohukom.

Click here for Election 2010 updates

Sa iyang bahin, si Kong. Antonio Cuenco namahayag nga kon mohukom ang korte nga ipadayon ang plebisito nagduda siya nga wa nay panahon pagpahigayon.

Nagtuo si Cuenco nga mapahigayon kini unya na gyod sa human sa eleksyon posible sa Hunyo o kaha sa Hulyo nga wa nay gimbuhaton sa nagsingabot nga eleksyon ang Commission on Elections (Comelec).“Seguro ko nga matangtang ang TRO,” matod sa kongresista.

Kagahapon, si Cuenco nitestigo sa korte nga sa iyang pakisusi ang Rosalina Village anaa gyod mahisakop sa Barangay Guadalupe ug di sa Barangay Labangon diin si Labangon Barangay Councilor Victor Buendia anaa magpuyo.Gipresentar niya ang mga hulagway sa gitay-an nang mga house number sa mga balay nga anaa sa Gudalupe.

Si Engr. Leopoldo Tuastumban, gisugo ni Cuenco nga mag-survey sa utlanan sa Guadalupe ug Labangon, nipahibawo nga ang Rosalina Village sakop sa Guadalupe.