HAPPY April everyone! Grasya ni Lord, buhi pa kita, ug padayong naga-atubang sa mga hagit ning kalibutan dinala aning epidemya nga coronavirus disease (Covid-19).
Pit-os sa kadaghanan kay apektado kaayo ang atong panginabuhian. Ang lansang nga among ginagamit sa usa ka hardware ra sa syudad sa Dabaw mapalit. Tungod taga-Panabo mi ug senior citizen pa gayud akong amahan, wala siya gitugutang makalusot sa checkpoint.
Sa among negosyo kung walay lansang, walay trabahuon ang mga panday, wala mi ibaligya so wala mi income. In short, pasmo ang mga trabahante ug amo hu hu!
Naa kunoy ipanghatag ang barangay apan sa among dapit, wa jamu, nada, zero! Sige lang kay "namalut" pa seguro. Paabot lang ta gamay kay dili pod baya lalim ang obligasyon nga nakasablay sa opisyales nato sa barangay busa dili lang ta mangaway, okey? Mag pray ta. Amen?
Dili na lamang mga pasyente apan mga doktor pod ang nakutloan og kinabuhi mahitungod aning Covid-19. Matud sa mga eksperto, dili tanan mamahimong magkasakit apan tanan pwedeng "carrier" o tagatakud sa maong sakit busa importante kaayo nga mosunod kita sa mandu sa gobyerno ug hangyo sa mga doktor nato nga magpuyo lang sa balay!
Makadismaya pamalandungon nga alang na gani sa atong kaayohan ang mandu sa gobyerno, supakon pa gayud nato. Nagtuo seguro sila nga mamili ang Covid-19 og mabiktima, dili gayud baya!
Dinhi sa Panabo, usa pa lamang ang natalang positibo sa maong sakit, apan walay makasulti kung ang kadaghanan kanamo "Covid-19-free" kay wala man kita ning agi'g test sa laboratory.
Gahi ra kaayo og mga ulo ang uban tungod kaha sa ilang pagka-ignorante o tungod wala lang gayud wala silay pakialam (indifferent)? Bisan asa sila naapil nga kategorya, delikado kaayo kung susamang mga tawo ang makauban ta kay mga pandamay gyud ni sila.
Karong panahona, unta mas atong hunahuan ang makaayo kanato, sa atong pamilya ug sa katilingban, higala. Kitang tanan apektado sa pandemya; mas nindot nga parte kita sa solusyon DILI dugang konsumisyon.
Lumalabay ra kitang tanan sa kalibutan, kung nagdali nga mopanaw ang uban; mas daghan tingali ang gusto pang magpabilin dinhi sa earth nga buhi. Buhaton nato ang atong tagsa-tagsa ka obligasyon aron mapugngan ang daghang kamatay, igsuon.
Ayaw kalimti nga ang nasud Pilipinas pobre. Wala kita'y paigong mga ospital, pasilidad, kagamitan ug mga personahe nga maghatag og kasegurohan nga sakto kitang tanan matambalan.
Nag-collapse man gani ang institusyong medikal sa nasud Italya nga high-tech ug datu sila. Mag unsa na lang kaha ang Pinas, higala?
Hangyo lang, bisan dili kita paryente, kauban kitang nag-atubang sa pandemya. Dili ba mas nindot nga magtinabangay na lamang kita?
Please.... kay ang mga walay kahibalo o ignorante sa isyu ug ang mga walay pakialam, mauna kini silang mangawala sa kalibutan.