SUPERBALITA DAVAO

400 nag-derby gipangita human 12 nagpositibo sa virus

File photo

GIBUTYAG sa Department of Health-Regional Epidemiology and Surveillance Unit (DOH-Resu) nga ilang gisubay karon ang gibanabana nga 400 ka indibiduwal kinsa naladlad sa New Davao Matina Gallera sa siyudad sa Davao human ang 12 ka nag-derby nakompirma nga dunay coronavirus disease (Covid-19) kon diin ang upat namatay tungod sa respiratory infection.

Gikanayon ni Dr. Cleo Fe Tabada, medical officer sa DOH-Resu Davao, nga ang nakompirmang kaso nga nakaadto sa sabongan.

Gilusad na ang "contact tracing" karon sa ilang surveillance team aron pagsusi kadtong mga tawo nga gikakulabildo ug nahiduol sa mga nag-derby una nigawas ang resulta, ug uban pang mga tawo nga nakaadto sa sabongan.

"As far as we've seen the list, we're not even sure if it was the exact list. There were about 400 people inside that pero this is a span since the start on March 6 to 12. We're just basing on the list. We're not exactly sure if it's complete but we're looking into it. But for now, we're looking for about 400 people," tin-aw ni Tabada.

Ang halapad nga inpeksiyon sulod sa sabongan napamatud-an nga duna nay local transmission sa dakbayan.

Dugang ni Tabada nga ang ilang tim nakigkoordinar na sa tagdumala sa New Davao Matina Gallera alang sa ensaktong gidaghanon sa nisalmot sa derby ug matumbok kinsa ang atua aron nga mapugngan ang dugang transmisyon, pananglitan, kon sila positibo.

Hinuon, matud niya nga gihimo na ang pag-disinfection sa Davao City Health Office (CHO) sulod sa sabongan aron nga mawagtang ang kagaw.

Sa datus niadtong Huwebes, Abril 2, sa 61 nga nakompirmang kaso, gikanayon sa DOH Davao nga 12 ka pasyente ang giatiman, 12 namatay samtang usa nakarekober.

Tungod sa nagkataas nga ihap sa nakompirmang kaso, giangkon ni Tabada nga ang "contact tracing" dakong hagit para kanila. Wala pa gani sila makatunga sa gitarget nilang mga indibiduwal. Hinuon nakigkoordinar na sila uban sa National Intelligence Coordination Agency (Nica) ug sa Criminal Investigation and Detection Group (CIDG) aron nga masubay ang naapektuhan nga mga tawo.

"Naa na tay local transmission kay atong mga kaso nga nakita-an diri lang sila but they were exposed by a person who traveled or exposed to a positive case," tin-aw ni Tabada.

Gawas sa sabongan, giklaro sa DOH-Davao nga ila sab nga gisusi ang kasal ug graduation ceremonies isip laing hinungdan sa local transmission human mga pasyente nahiling nga positibo. Wa hinuon naghisgut ang DOH kon asa kini nahitabo.

Sayo niini, gibutyag ni Tagum City Association of Barangay Captains president Bryan Kim Samuel Angoy nga siya usa ka "presumptive positive case" sa coronavirus disease (Covid-19), base sa iyang local laboratory test result nga gihimo sa Southern Philippines Medical Center (SPMC).

Dugang pa niya nga una siya nakitaan og mga simtomas, niadto siya sa Matina Gallera niadtong Marso 10 ug 12.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph