DAGHAN ang di motuo nga si Mayor Socrates Fernandez ang nagmaneho sa iyang sakyanan nga nabanggaan sa motorsiklo didto sa Cebu South Coastal Road (CSCR) sa may eskina San Isidro, Talisay City niadtong Lunes sa udto.
Mga trisikad driver niingon nga ilang nakit-an si Joavan nga nanaog sa sakyanan ug nisibat.
Apan si Mayor Fernandez nitataw nga siya gyud ang nagmaneho sa sakyanan ug nag-una ang iyang anak nga maoy nag drive sa green nga Pajero.
Giangkon sa mayor nga gikan siya sa City Hall ug niadto kaniya si Joavan tungod kay dunay tuyo ug nag convoy na lang sila sa pagpauli ngadto sa barangay Bulacao ug didto sila agi sa CSCR sa San Isidro.
Matod sa mayor nga mismo ang driver sa motorsiklo nga si Colin Labrado nga taga Rizal, Pinamungajan, Cebu niangkon nga maoy sad-an tungod kay nipugos siya paglabang bisan og stop na ang signal.
Didto sa nahitabuan, dunay bumper sa sakyanan ang nakit-an tupad sa nagusbat nga motorsiklo ni Labrado.
Apan dali kini nga gipahipos ni Fernandez ang motorsiklo.
Mga trisikad driver nahibung nga ang motorsiklo gisakay sa Revo nga sakyanan sa City Hall samtang ang driver gihatod lang sa trisikad.Si Mayor Fernandez nipasalig nga maoy moabaga sa galastuan sa ospital ni Labrado ug iya pang ipaayo ang naguba nga motorsiklo. (VLM)