Holiday pay mamahimo rang ma-delay

MAMAHIMONG langayon sa kompaniya sa paghatag ang holiday pay sa mga trabahante alang sa umaabot nga tulo ka mga holiday Abril.

Naglakip kini sa Abril 9 - Araw ng Kagitingan ug Holy Thursday, Abril 10 - Good Friday, ug Abril 11 nga Special Non-Working Holiday.

Kini human miluwat si Labor Secretary Silvestre Bello III sa Labor Advisory No. 13-A Series of 2020 nga mamahimo rang i-postpone una sa mga kompaniya ang holiday pay sa maong mga holiday tungod sa crisis sa Covid-19.

Gihatagan karon og konsiderasyon ang employers sa Department of Labor and Employment (DOLE) nga unya nalang i-release ang holiday pay subay niining national emergency nga dala sa Covid-19.

Matod ni DOLE 7 Regional Director Salome Siaton nga kadtong temporaryo nga gisirhan nga mga trabahoan subay sa enhanced community quarantine, mamahimo ra nga dili una sila mobayad sa holiday pay sa maong buwan.

Apan kon ma-normal na og balik, diha na mobayad ang employer sa holiday pay sa tulo ka holiday sa Abril.

“Just to let companies be aware in advance of the rules to be adhered to in the computation of the holiday pay for the three holidays, we are also giving out advance information so that they will be guided,” matod ni Siaton.

Ubos sa Labor Advisory No. 13, series of 2020, gisaysay kon pila ang madawat sa mga empleyado sa regular holidays sa Abril 9 ug 10 ingon man sa special day sa Abril 11.

Alang sa Abril 9, kadtong dili motrabaho anang adlawa, makadawat gihapon sila og 200% sa ilang daily rate kana kon present sila o naka-leave with pay sa wala pa gipatuman ang Enhanced Community Quarantine sa ilahang dapit.

“The start and effectivity of the enhanced community quarantine declared in each province or city within Central Visayas must be considered by employers. That will signal then whether a worker who will not report to work on April 9 will be paid 200% of his or her daily wage rate or not,” matod ni Siaton.

Kon kinahanglan motrabaho sa Abril 9, anaa sa 300% sa ilang daily wage ang madawat sa trabahante.

Alang sa Abril 10 o Good Friday, 100% alang sa wala mitrabaho samtang 200% sa nitrabaho kon nisulod kini sa ilang trabahoan sa wa pa gipatuman ang ECQ.

Samtang sa Abril 11, no work, no pay kini diin nagpasabot kini nga dugang 30% ra sa mga trabahante ang mahatag kon motrabaho. (HBL)