TULO ang nadakpan sa duha ka managlahi nga anti illegal drugs operations sa Station Drug Enforcement Unit (SDEU) sa Parian Police Station ug Labangon Police Station sa Cebu City Police Office (CCPO).
Unang nadakpan si Agnes Perez, 23, taga Sityo San Miguel, Barangay Lorega San Miguel, Siyudad sa Sugbo, kinsa nasakmitan og drugas nga mobalor og P68,000.
Matod ni Police Maj. Armando Labora, hepe sa Parian Police Station, nga si Perez baby sitter sa ilang silingan, apan sekreto nga namaligya og drugas.
Si Perez gipriso sa Parian Police Station human sa buy-bust pasado alas 9 niadtong Huwebes sa gabii sa Abril 2, 2020.
Laing duha usab ang nadakpan sa anti illegal drugs operation sa SDEU sa Labangon Police Station 10 pasado alas 9 sa Biyernes sa buntag.
Si Police Capt. Jonathan Dela Cerna, nangu sa buy bust operation, diin nasikop si Arturo Abella, 44, taga Don Bosco Proper, Barangay Punta Princesa ning siyudad. Samtang ang kunsabo niini nga si Novi Lapay, 39, naapil og kasikop.
Ang duha pulos mga construction worker, taga sityo Nazareth, Barangay Buhisan, Siyudad sa Sugbo. (BBT)