MOABOT og 1.3 million ka low-income nga mga panimalay sa Central Visayas gitakdang makadawar P6,000 cash assistance bisan unsang adlawa ning buwana ubos sa social amelioration program nga gipangulohan sa Department of Social Welfare and Development (DSWD.)
Kini human ang Department of Budget and Management (DBM) nipagawas sa P100 billion (alang sa 18 million ka panimalay sa nasod) ngadto sa DSWD aron gamiton ang pundo alang sa panginahanglansa sa social amelioration program, Huwebes, Abril 2, 2020.
Ang social amelioration program ubos sa Republic Act No. 11469, kun Bayanihan to Heal as One Act gitumong aron di mograbe ang mga epekto sa coronavirus disease 2019 (Covid-19.) Ang pagpanghatag niini, hinuon, "subject to the level of need of the beneficiary."
Si Shalaine Marie Lucero, DSWD-Central Visayas assistant director, niingon nga ang 1.3 milion ka mga panimalay ang gitakdang makabenepisyo gikan sa cash aid, ang 294,000 ka mga panimalay mga sakop sa Pantawid Pamilya Pilipino Program (4Ps) samtang ang nangahabilin beneficiaries sa Unconditional Cash Transfer (UCT)-Listahanan ug kadtong ni-qualify ubos sa informal economy workers nga giila sa ilang local government units (LGU.)
Ang Informal economy workers naglakip sa pedicab, tricycle, ug habal-habal drivers, farmers, gagmay nga sari-sari store owners, ug huyang nga mga sektor sama sa solo parents, mabdos ug nagpasuso nga mga babaye, indigenous people, persons with disability, ug way pinuy-anan.
"I-clarify lang namo nga they should belong in a family. Dili ni by person," matod ni Lucero.
Sa Listahanan members ug informal economy workers, ang DSWD, tinambayayungan sa LGU, maoy mang-apod-apod sa assistance.
Matag balay
Mangunay ang social worker sa Lapu-Lapu City inabagan sa barangay sa pagpang apod-apod sa porma alang sa Social Amelioration Fund ngadto sa balay sa matag beneficiaries.
Giklaro ni Mayor Junard Chan nga bugtong ang siyudad ray moprinta sa 37,000 ka mga blank forms nga adunay managlahing serial numbers, samtang kadtong illegal nga gi-reproduce nga porma di tahuron sa City Social Welfare and Development Office .
Kini sa dihang niadtong Huwebes, Abril 2, nihugpa ang mga senior citizen, persons with disablities (PWD), displaced workers sa buhatan sa social welfare human nasayod nga aduna nay forms nga nangabot.
Samtang adunay pipila ang aduna nay kopya sa form nga ilang gi-download online ug nipasa niini sa maong buhatan, ang wa dawata.
“Our procedure is... we will go to your house. Ang atong mga social welfare sa city mo-house to house sila para pag-distribute sa forms. Para makuhaan ang mga beneficiaries sa ilang habig kon unsa man gyud, mo-qualify ba sila?,” sumala pa sa mayor.
Gipahibaw sab sa maong opisyal nga ang siyudad igo lang mo-facilitate o moabag sa nasudnong kagamhanan kay ang pundo maggikan man nila o sa national agency concern, dili sa city hall.
Laing pasabot ni Chan nga kadtong nahatagan sa forms wa magpasabot nga qualified na sila kay magbase kini sa assessment sa national government.
Sumala pa sa mayor nga sa usa ka balay, usa lang sa ilang miyembro ang maka-avail o way magdoble aron nga ma-apod ngadto sa uban ang maong hinabang.
Iyang gisanglitanan nga sa usa ka household adunay ginikanan nga senior citizen, laing sakop sa pamilya ang nawad-an sa panginabuhian gumikan sa gipatuman nga enhanced community quarantine ug aduna pay sakop nga usa ka PWD, usa lang ka sakop ang i-approved sa national government.
“Maayo ning maklaro kay basin magtuo nya na sila nga gipili ra ang hatagan o adunay gipaboran. Dili ta gusto nga ma-brand ni sa pamulitika kay ang tanang mag-agad sa national government,” asoy ni Chan sa dihang nahinabi sa Superbalita Cebu.
Ang Department of Interior and Local Government (DILG) miawhag sa tanang local government units lukop nasud nga paspasan ang pagpang apod-apod sa Social Amelioration Card (SAC) ug ang master list sa tanang qualified beneficiaries. Pamahayag ni DILG Secretary Eduardo Año nga niining krisis nga gi-atubang karon diin daghan ang apektado gumikan sa lockdown, angay nga hatagan sa assistance sa kagamhanan.
Ang cash assistance mokabat sa P5,000 ngadto sa P10,000 madawat sa matag qualified beneficiary base sa Bayanihan to Heal as One Act.