GUSTO nang mouli sa Pilipinas si World Boxing Organization (WBO) bantamweight champion Johnriel Casimero.
Hinuon, nahadlok ang gitawag og "Quadro Alas" nga mobiyahe gumikan kay dili kini gustong mataptan sa makalilisang nga coronavirus disease (Covid-19) nga ningkuyanap na sa tibuok kalibutan.
Sulod na sab sa pipila ka mga semana nga nag=training si Casimero sa Las Vegas bisan wala pa'y klaro kon kanus-a mapahigayon ang iyang umaabot nga dakong away.
Nakatakda untang makigharong si Casimero batok kang Japanese superstar Naoya "Monster" Inoue karong Abril 25 sa USA ka unification bout apan nauswag kini sa wala pa'y karong petsa gumikan sa hulga sa Covid-19.
Sa usa ka artikulo nga napatik sa www.boxingscene.com, nagkanayon si Casimero nga wala na siya'y gawasgawas sa balay nga iyang gipuy-an sa Las Vegas sa kahadlok nga mataptan siya sa Covid-19.
Hinuon gitataw ni Casimero nga layo sa kabihasnan ang iyang gipuy-an gumikan kay naa kini sa bukiran nga dapit ug gamay ra ang mga tawo.
Apan bisan pa niini, wala mokompiyansa si Casimero ug gibuhat niini ang tanang angayang buhaton aron makalikay sa Covid-19.
Nidugang si Casimero nga gawas sa hulga sa Covid-19, ang travel restrictions ug pinansyal nga aspeto maoy nakadugang og kahasol sa iyang tinguha nga makauli.
Gipasabot ni Casimero nga gibati na siya og tumang kahadlok gumikan kay daghan nang mga tawo ang nataptan sa Covid-19 sa Amerika.
Asoy ni Casimero nga tinguha unta niyang makig-uban sa iyang pamilya sa Ormoc City ning panahon sa krisis sa kahimsog apan wala siya'y mahimo.
Una siya milarga paingon sa Las Vegas, si Casimero nag-training pa sa Miami Sulod sab sa pipila ka mga higayon.
Naangkon ni Casimero ang oportunidad nga makigharong kang Inoue human niya nadaog ang WBO title pinaagi sa makapaukyab nga kadauan batok kang South African Solani Tete. Bitbit ang 29-4, 20KOs nga rekord, si Casimero nagpanikad na untang makig-away kang Inoue hinungdan nga daw mihagsa ang kalibutan dihang nasayran niyang nauswag ang away tungod sa Covid-19 niadtong Marso 16.
Bisan pa niini, padayon nga nag-ensayo si Casimero sa pamasin nga madayon ra ang away sa original nga petsa niini.
Apan ning puntoha, daw nadawat na ni Casimero nga dili madayon ang ilang away ni Inoue sa orihinal nga petsa hinungdan nga nagtinguha na kining mobalik sa Pilipinas.
Si Inoue, kinsa giingong maoy labing maayong boksidor sa iyang timbang, naggunit og 19-0, 16 KOs nga rekord. (ESL)