SA WALA pa gisuspenso sa Fiba ang tanan nilang mga kalihukan gumikan sa coronavirus disease (Covid-19), ang Gilas Pilipinas nakarehistro na og kadaugan alang sa kampanya niini aron maka-qualify sa 2021 Fiba Asia Cup.
Ang batan-ong puwersa sa Gilas, nga gipangulohan sa magsuong sila si Kiefer ug Thirdy Ravena, ningmakmak sa Indonesia, 100-70, niadtong Pebrero.
Ning sangkaa, si Thirdy nakamugna og 23 puntos aron ipakita kon unsa ka dako ang iyang potensyal.
Ang kadaugan, nagpahiluna sa Gilas Pilipinas sa ikaduhang dapit sa Group A dala ang 1-0 nga rekord sunod sa South Korea nga adunay 2-0 nga baraha.
Human nila gilampornas ang Indonesia, ang Gilas nakatakda sab untang makigduwa sa Thailand apan nauswag kini gumikan sa Covid-19.
Ang kanhi team captain sa Gilas nga si Jimmy Alapag naghinamhinam nang mobalik og aksyon ang Philippine men's national team.
"I would love to see the Philippines again be in the finals," matod ni Alapag sa interbyu sa Fiba Asia sa Instagram.
Ang Gilas nakasulod sa finals sa Fiba Asia niadtong 2013 ug 2015 editions apan pakyas paglangkat sa korona.
"Who they would play, that's up in the air. You talk about China, Korea, Japan, Iran, Jordan, Lebanon, Australia, New Zealand. It could be any of those teams," batbat ni Alapag sa Spin.ph.
"But it'd be great to see the Philippines play in the finals in 2021." (ESL)