Mega quarantine facility gipahimo

GISUGDAN na ang paghimo sa Philippine Arena sa Bulacan nga usa ka "mega-quarantine" facility aron magamit sa mga mangataptan sa makalilisang nga coronavirus disease 2019 (Covid-19).

Ang religious sect Iglesia Ni Cristo, nga maoy tag-iya sa Philippine Arena, miuyon nga gamiton ang labing dakong indoor arena sa kalibutan isip temporaryong pasilidad alang sa mga pasyente sa Covid-19 sa Central Luzon.

Mao kini ang gibutyag ni Bases Conversion and Development Authority (BCDA) Vince Dizon atol sa Laging Handa briefing.

"Ang Philippine Arena ay magiging isang mega-quarantine facility sa Central Luzon," matod ni Dizon nga napatik sa www.abs-cbnnews.com.

Ang gobiyerno kasamtangan nagtukod og isolation rooms ug sealed nurse stations sa Philippine Arena ug lain pang sports stadiums aron maseguro nga dili na mograbe ang pagkatap sa Covid-19.

"The facilities are designed to make sure that patients are comfortable," batbat ni architect Daniel Lichauco, kinsa maoy nangulo sa design team.

"Lahat ng ginagawa namin has a nurse system na parang sa hospital ibig sabihin you can turn on a light para alam ng mga nurses san pupunta."

Sa Metro Manila, gipanghimo na sab nga temporaryong quarantine facilities ang Ninoy Aquino Stadium sa Rizal Memorial Sports Complex, Philippine International Convention Center, ug World Trade Center.

"Gusto po natin mapigilan ang pagdagsa ng mga ito sa mga ospital para yung mga ospital po natin ay nakatutok sa mga kritikal at severe ang sakit at pangangailangan," pasabot ni Dizon.

Ang New Clark City sa Tarlac kasamtangan gipa-disinfect aron sab nga quarantine facility.

Sa magsunod nga duha ka mga semana, ubay-ubay pa nga mga edipisyo ang panghimuon nga quarantine facilities.

Ang Covid-19 nakatakod na og 2,633 ka mga pasyente sa Pilipinas ug aduna na'y 107 nga mga ningpanaw. (ESL)