ABOGADO sa duha sa pito ka mga suspek nga sa pagtabang og lugos sa 16 anyos nga dalaga ug nipatay sa uyab niini, moduso og motion for preliminary investigation.
Ang Lapu-Lapu City Police Office (LLCPO) niduso og kasong murder ug rape niadtong miaging semana sa buhatan sa Piskaliya batok nila ni Jeffrey Cabilao ug Joel Ramirez, pulos mga 19 anyos ug laing lima ka mga menor de edad.
Si Atty. Nilo Ahat nireklamo batok sa kapulisan human nga ang mga ginikanan sa mga dinakpan ningpasangil nga gikulata ang ilang mga anak.
“Gikulata kuno ang ilang mga anak aron motug-an,” matod ni Ahat sa dihang nahinabi sa Sun.Star Superbalita.
Nakita usab niya nga adunay giingong “short cuts” sa “proceeding in handling juvenile in conflict with the law” sa pasangil nga gisagol ang mga menor de edad ngadto sa mga hamtong nga binilanggo sa LLCPO holding cell.
Apan gipanghimakak sa hepe sa LLCPO, PSSupt. Mariano Natuel Jr., ang pasangil.
Matod ni Natuel nga wa kulataha ang mga dinakpan ug di mahitabo nga isagol ang mga minor de edad sa ubang mga binilaggo.
Gitataw ni Natuel nga ang ilang holding cell adunay tulo ka mga selda, diin lahi ang babaye babaye ingon man mga menor de edad.
Samtang ang hepe sa Police Station 5 PCInsp. Conrado Manatad niingon nga nakig-alayon na sila sa barangay opisyal sa Pusok, Ibo, Buaya ug Bangkal nga mopatuman na sa curfew ordinance.
Sa tinguha nga di na masubli ang gang rape ingon man sa pagpusil patay sa 16 anyos nga si Russell Booc diin nagsilbi nga suspek ang pito sa mga batan-on nga sakop sa gang.
Matod ni Manatad nga ang barangay Buaya ug Ibo mopatuman sa curfew sugod sa alas 10:00 sa gabii ngadto na sa alas 4:00 sa kadlawon.
Sa mga alas 11:00 sa gabii ngadto na sa alas 4:00 sa kadlawon ipatuman ang curfew sa barangay Bangkal ug Pusok gumikan kay ang nahisgutang barangay adunay night high school. (FVQ)