SUPERBALITA CEBU

Nadela: Gubot pa sa lukot

Asoy Ni

UNSA na ang akong giingon. Sakyn gani og pamolitika ang pagpang-apod apod sa bugas ug di latang pagkaon magkagubot gyud. Samot na sa distribution sa quarantine pass.

Alang sa tanan importante kaayo kini agi og paghatag og kahigayonan nga makalihok ka nga di angay nga mabalaka.

Sa tinuod lang kanang quarantine pass sumpay na sa tinai sa labing daghan. Pinaagi sa quarantine pass makapadayon sa pagpanginabuhi kadtong nawad-an sa trabaho kay nanira ang ilang gitrabahoan ug ang mga gitawag nga self employed.

Sama sa bag-o nakong nakaila nga manglutoay og sud-an diha sa Banawa, Guadalupe Cebu City. Sa wa pa ang Enhanced Community Quarantine (ECQ) daghan siya og mga suki nga hatdan sa ilang mga order nga pagkaon. Si Matmat Hisoler nahugno kay gawas nga nawagtang na ang mga order pagsugod sa ECQ wa pa gyud moabot ang iyang gituhoan nga makatabang sa iyang nagusbat nga panginabuhi.

Ang ECQ Pass unta maoy iyang gituhoan nga mapahibalo ang iyang mga suki nga mahimo na sila nga maka order pag-usab kay sayon naman unya kini niya nga ma-deliver unya sayon ra sab siya nga makapangumpra.

Karon ra bang panahona daghan ang mogamit sa social media aron mo-order og pagkaon nga dala ang delivery. Kay mao naman ang iyang naandan kaniadto, pinaagi sa ECQ Pass dali ra niya kining buhaton kay mao man ang iyang nasnsan sa wala pa manghasi kining coronavirus.

Pila ba ka Matmat ang nagsige og bagulbol hangtod karon tungod sa kalangay ug ka way klaro nga distribution sa ECQ Pass. Ako bitaw nagproblema man mahotungod niini. Ang akong ECQ Pass para sa Cebu City ra. Unya kay naa man ko pasyente nga may cancer diri sa balay. Kong sa tambal lang di problema kay mapalit man sa bisan asang botika.

Unya kay naa pa man siyay mga herbal nga tumaronon nga kasagaran ang tinubdan adto sa gawas sa dakbayan sa Sugbo, unsaon man ni nako. Sigurado ko nga problema sab ni sa uban nga dunay pasyente sa ilang balay. Samot na kong kuwarta ang hisgutan nga adto sa gawas sa dakbayan sa Sugbo pangitaon.

Mao na ang dakong problema sa nakalabay nga mga adlaw nga gipistahan sa social media. Mga hait nga komentaryo, lalis ug bisan unsa nalang. Gani daghan na ang naghisgut og eleksiyon diin ilang gitumbok ang mga politiko nga ilang gisaway, ilang pildihon.

Nagsulti man sa tinuod o wala ang maong mga netizens, alang nako usa ni sa hatagan og gibug-aton kinsa man ning mga gipasanginlan. Kong limtanon kaayo ang mga botante sa mga hiwi nga binuhatan sa mga politiko, pastilan kong di na gyud sila makalimot sa mga panaugdaug karon nga ilang nasinati, mangamuti gyud ning wala magtinarong sa ilang katungdanan.

Ingon sila daghan og kausaban ang nabuhat sa Covid19. Kong malakip ang politika, makaingon ta nga meresi sa mga mapahimudsanon. Pero sa mga nagtinarong, way pabor pabor, ug labaw nga way pagpanikas nga gihimo sa mga hinabang ug donasyon, ang ganti di lisod kab-oton.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph