PANULTIHON nga kon dunay aso dunay kalayo. Miaso ang hungihong nga kudeta pagpaagpot sa representante sa Taguig-Pateros isip house speaker nga si Alan Peter Cayetano. Nangunay pagbutyag si Cayetano human misulti kaniya ang 20 ka mga kongresista nga giduol ni Marinduque Rep. Lord Allan Velasco. Daling gipanghimakak ni Velasco ang maong pasangil nga kudeta. Sa sayo pa maoy kagustohan ni Pres. Rodrigo Duterte nga magtunga sa speakership sila Cayetano ug Velasco aron paghilot sa inilogay sa taas nga pwesto sa kamara. Sa Oktobre pa mopuli si Velasco basi sa term sharing agreement. Dili makatarunganon kon tinuod ang maong laraw. Angay patiwason si Cayetano kay mohulip naman si Velasco sa Oktobre segun sa gibahig nga kasabotan.
Apan karon gihulagway nga inihap nalang ang adlaw ni Speaker Cayetano mamiligro nga ilansang sa krus. Gisakyaan sa mga kongresista ang duha ka mga isyo. Una, gilangay ni Cayetano ang pagtuki sa prangkisa sa ABS-CBN sa katarungan nga dili prayoridad. Daghan ang atimanon pagtuki sa hawanan sa kongreso sama sa budget, covid-19 ug pagbuto sa bulkang Taal. Ikaduha, ang kabalaka sa mga magbabalaod sa gibutyag sa Department of Budget and Management (DBM) nga siksikon og balik ang 80B pesos ubos sa 2020 nga gahin una pa ipagawas ang maong pundo ngadto sa ilang tagsa-tagsa ka mga distrito. Mao ni gibutyag ni Sen. Panfilo Lacson nga sekretong pork barrel nga gisukip.
Mamiligro nga malangkatan sa gahom si Speaker Cayetano kay misalga na sa maong isyo ang mga anak sa presidente nga sila Davao Mayor Sara Duterte-Carpio ug Rep. Polong Duterte. Pagtulon-an ni Cayetano ang nahitabo ni House Speaker Pantaleon Alvarez.
Sa 2018 si House Speaker Alvarez gipalagpot human gilaslasan ang district allocations sa mga sakop sa oposisyon. Gihulipan ni Pampanga Rep. Gloria Arroyo pagka-speaker. Gikabangi ni Alvarez ang Tres Marias nga sila Davao Mayor Duterte-Carpio, Pampanga Rep. Arroyo ug Ilocos Gov. Imee Marcos. Misamot nga gikabangi sab ni Alvarez sila Rep. Tony Boy Floirendo. Gen. Ronald “Bato” dela Rosa, BOC Chief Nicanor Faeldon, Senate Pres. Koko Pimentel ug PLLO Sec. Adelino Sitoy.
Mialisngaw ang kainit sa maong isyo. Gitangtang ni Cayetano ang dagkog pwesto sa kamara nga sila Rep. Isidro Ungab nga chairman sa committee on appropriations ug Rep. Salvador Leachon nga chairman sa house of representatives electoral tribunal. Giingon nga si Pres. Duterte maoy misugyot pagpili nila ni Ungab ug Leachon nga maoy mohupot sa maong mga komitiba. (csa_1156@yahoo.com / 09064648954)