GILAYONG daw nagkaguliyang ang mga residente sa Davao City nga nangita kung asa na ilang mga purok leader kay mokuha og Food and Medicine (FM) pass alang sa Enhanced Community Quarantine (ECQ) kay lagi gibutyag nga ipatuman na ang ECQ sa dakbayan sa Davao sugod Abril 4, 2020.
Dihang nakita ni Davao City Mayor Sara Duterte-Carpio nga diha’y mga barangay nga wala pa nakahuman sa pagpang-apod-apod sa mga FM pass gilayong mi-desisyon ang mayor nga isibog kini sa Abril 7, 2020 karong Martes.
Gilayon sab nga mituman ang ginsakpan sa kapulisan sa Davao City Police Office (DCPO), butang nga sa Abril 7 pa nila ipatuman ang istrikto nga pagpangita og mga FM pass sa mga tawo nga anaa sa publiko.
Ugaling maglakaw-lakaw nga walay dala nga FM pass ug identification card (ID) sa kung kinsa ang nakapangalan sa FM pass, mamahimong ubanan siya sa pulis balik sa ilang balay, pahibal-on pag-ayo unsay anaa sa pagpatuman sa ECQ.
Ning mga gutloa padayon ang pagpang-apod-apod sa mga FM pass, apan di gyod malikayan ngari sa 182 ka barangay ning siyudad, duna gyo’y mga purok leader nga daw pulpol, subay sa mga lehitimong reklamo sa mga residente.
Naay mga barangay nga ilang gilimitahan ang pag-isyu og mga FM pass, sa maong hitabo, maayo kay aron malimitahan sab ang paggawas sa mga tawo, diin sa usa ka pamilya, duha lamang ka miyembro niini ang puwede makagawas kung mopalit og medisina ug pagkaon.
Apan, ang nakapulpol sa ubang mga purok leader, dunay mga pamilya nga wala nila nahatagan, kay lagi walay tawo sa ilang pag-adto sa balay atol sa pagpanghatag. Buot-ingnon niini, dunay mga pamilya nga mapriso sa ilang mga balay, dili man sila kagawas kay walay FM pass.
Ang nahitabo man gud dili organisado ang pagpanghatag sa FM pass nga gisangon sa mga purok leader, buot-pasabot, dunay mga purok leader nga wa gyod mihunahuna kung naa pa bay pamilya nga wala nahatagan sa iyang dapit.
Gilista unta sa purok leader ang tanang pamilya sa iyang ginsakupan, ug gilahi na daan ang mga FM pass sa usa ka pamilya, ibutang nga ang tanan duna nay tag-iya, dili nalang magpataka sa pagpanghatag ug si bisan kinsa nalang ang hatagan, kay lagi nabandilyo nga dunay mga nahatagan nga suod nga mga higala sa purok leader gikan sa laing purok.
Migula man gud nga dunay tag duha o tulo ka mga FM pass sa usa ka pamilya, nga ang husto man gayod, usa ra ka FM pass sa usa ka pamilya, “sharing” ang mahitabo unta, apan, wala kini mahitabo, dunay misipyat ug nagtanga-tanga nga mga purok leader.
Puwera sa ubang purok leader sa ubang barangay nga organisado ang ilang pagpanghatag, miresulta nga walay natigayong yagaw sa pagpang-apod-apod ug napabilin ang social distancing.
Duha pa ka adlaw ang nahibilin sa pagplastar sa mga barangay kung kinsa ang wala nahatagan nga mga pamilya, unta mismong si kapitan ang mosubay niini nga problema, pero mismong si kapitan galingkod ra pod. Susmaryosep!