NANAWAGAN karon ang lokal nga kagamhanan sa Mati sa Davao Oriental sa mga taga Mati City nga mouli gikan sa Davao City nga kinahanglan mopailawom sila sa proseso sa health department sa maong siyudad una sila tugtan nga makasulod sugod Sabado, Abril 4, 2020.
Sa impormasyon gikan kang Mati City Information Office department head Ben Tesiorna nga kinahanglan mopailawom ang usa ka indibiduwal sa screening una kini tugtan nga makasulod sa siyudad.
Sumala ni Tesiorna nga dunay screening area pag-abot sa Mati welcome Arch sa border sa San Isidro ug Mati City diin tanan panaugon sa sakyanan dayon ipailawom sa makuti nga screening sa mga health authorities sa dakbayan.
Dugang sa opisyal nga kuhaon sab ang mga detalye sa usa ka indibiduwal sama sa pangalan niini, address sa iyang gipuy-an sa Mati ug papirmahon sila sa usa ka dokumento diin nakabutang nga misugot sila sa 14-day mandatory home quarantine.
Pagbutyag ni Tesiorna nga kung masuta diha sa screening nga usa siya ka patient under investigation (PUI) dalhon dayon kini sa Provincial Hospital aron ipailawom sa checkup ug isolation protocol. Dunay pasilidad alang sa mga PUI nga travellers ug person under monitoring (PUMs) nga dili puwede alang sa home quarantine.
Dugang pa nga ang mga PUMs ug PUIs dunay nakatagana nga pagkaon kanila sud sa 14-days nga quarantine ug duna sab gitagana nga bus alang sa mga PUMs samtang ambulansya ang alang sa PUIs aron dalhon sila sa ilang panimalay ug sa PUI center.
Sa laing bahin, luyo sa paningkamot sa lokal nga kagamhanan sa Mati nga mapabilin ang kahimtang nga dili motaas ang kaso sa Coronavirus Disease 2019 (Covid-19) sa ilang siyudad, mapasigarbuhon nga gipahibalo sa dakbayan nga nag-negatibo na ang duha ka mga kaso sa ilang dakbayan.
Kini ang gikompirma ni Mati IMT Covid-19 commander Dr. Ben Hur Catbagan Jr. niadtong Biyernes diin insakto usa ka semana gikan sa ilang pagdawat sa confirmatory test result.
Giingon ni Catbagan nga human sa subling “swab test” sa PH (patient) PH1514 ug PH1516, migula nga negatibo sila sa ilang resulta, hinungdan nga gipagula na sila sa Davao Regional Medical Center (DRMC) sa Tagum diin sila na-admit sud sa mga semana, apan ang duha mopailawom pa gihapon sa istriktong pag-home quarantine ug dugang 14-days subay sa protocol sa Department of Health.
Samtang gipahibalo sab sa opisyal nga anaa sa maayo na nga kahimtang si patient #3 kinsa mipailawom sa home quarantine sud na sa duha ka semana kinsa asymptomatic (walay nakita nga sintomas).
“City of Mati Mayor Michelle Nakpil-Rabat meanwhile thanked the DRMC for taking care of the Mati patients as well as the Barangay Health Emergency Response Teams for their continued service since they were activated early February,” tipik sa statement sa CIO-Mati. (Jeepy P. Compio/CIO-Mati)