DAVAO DEL NORTE -- Sirad-an ang publikong palengke sa siyudad sa Tagum sugod sa Lunes, Abril 6, hangtud sa Abril 12, 2029. Kini maoy gipahibawo sa lokal nga kagamhanan sa dakbayan pinaagi sa ilang Facebook page.
Ang maong lakang himuon tungod sa market-wide decontamination aron tibuok palengke malimpyohan ug ma–disinfect sulod sa usa ka semana.
Subay sa gilusad nga contact tracing, nadiskobre, matud pa, nga dunay usa ka tawo nga nagpositibo sa Coronavirus Disease 2019 (Covid-19) sa siyudad nga naga-adto ug naga-estambay sa maong palengke.
Gibutyag nga ang pagsirado base sa rekomendasyon sa mga market stall owners ug sa mga tindera kinsa naglunsad og signature drive ug gipaabot ngadto sa lokal nga kagamhanan tungod sa dakong kabalaka, apilan pa sa wa pagsunod sa mga tawo sa polisiya sulod sa palengke nga mao ang social distancing.
Ang asosasyon sa palengke, matud pa, maoy midesisyon nga temporaryong moundang og pamaligya sa merkado sa siyudad sulod sa usa ka semana.
Ug sa maong oportunidad, gamiton sa City Economic Enterprises Office, City Health Office, ug City Disaster Risk Reduction and Management Office aron nga limpyohan ug i-decontaminate ang tanang dapit sa palengke.
Giklaro nga ang operasyon sa public market sa siyudad, mobalik sa normal sa Abril 13, 2020 apan padayon ang nakalatag nga polisiya sama sa schedule matag barangay, social distancing, ug uban pa hangtud nga hingpit nang mabuntog ang Covid-19.