AMAHAN sa usa ka binilanggo mipakita sa iyang gugma ngadto sa iyang anak, apan nabuhis ang iyang kinabuhi sa paghimo niini.
Matag kaadlawon sa mga adlaw sa tingduaw sa Cebu City Jail, mogikan na si Osias Dairo, 61, sa ilang balay sa Villagonzalo 2, Barangay Tejero, Dakbayan sa Sugbo aron pagduaw sa anak nga piniriso.
Sa naandan, magsakay unta siya og motorsiklo, apan kagahapon, Sabado sa kaadlawon, Abril 4, 2020, nanaug na siya sa motorsiklo kay gidili na ang pag-angkas tungod sa social distancing taliwa sa pagpatuman sa enhanced community quarantine (ECQ).
Iyang gibaktas ang kapin sa usa ka kilometro nga tungason nga bungtod samtang bitbit ang pagkaon ug ubang supply sa iyang anak nga napriso sukad pa sa Mayo 2019.
Ngan sa anak gipugngan ning mantalaan tungod sa hangyo sa pamilya.
Matod ni Police Staff Sergeant Eden Pailago sa Guadalupe Police Station, nga nakit-an sa ubang mga kabanay sa mga binilanggo nga nagpaabot usab sa gawas gate sa jail aron makatunol og pagkaon, nga nilingkod si Osias. Apan sa kalit lang nalup-og kini ug wa na maulii pa sa panimuot.
Naabot man tuod ang medical team sa Dakbayan sa Sugbo nga gialarma, apan patay na si Osias sa ilang paghiling.
Nagkwentas pa kini sa iyang ECQ pass samtang nagsandig nga nagyaka sa railings sa gawas sa gate.
Nasayran gikan kang Tito Dairo, manghud, nga matag Martes ug Sabado moduaw kini sa jail sa iyang anak aron lang modunol og mga pangkonsumo.
Si Jeorlyn Dairo, pag-umangkon ni Osias, nisaysay nga ang iyang uyoan alas 4 pa sa kaadlawon nga nilakaw aron pagduaw.
“Alas 4 intawon na siya sa kadlawon nilakaw, nagmotor. Gipabilin ang motor sa ubos kay di daw pwede. Mao ako uyoan naglakaw padung babaw nya una na siya nakalinya ngadto unya nakatulog man na siya,” matod ni Jeorlyn sa chat sa Superbalita Cebu.
Usa ka pulis ang nipukaw, apan giingon nga wa na kini makamata.
Iyang giklaro nga wa masakit ang iyang uyoan og coronavirus disease (Covid-19).
Masakiton kini og kasingkasing ug hubakon kay ilang kaliwat.
Nagtuo sila nga ang paglakaw og layo ug tungason ang usa sa hinungdan sa kamatayon sa ilang uyoan.
“Naningkamot intawon na siya makaduaw ako ig-agaw,”dugang niya.
Makagawas na unta ang anak, apan naabtan sa ECQ.
Imbestigasyon
Alas 5 sa kaadlawon nabantayan sa mga jail officers sa Cebu City Jail sa ilang CCTV camera nga naabot si Osias sa waiting area aron magpaabot sa pag sugod sa pagpanawat sa bisita inig ka alas 8 sa buntag.
Apan pipila ka minutos ang naka labay ilang nabantayan nga kalit lang nga nawad-an sa panimuot tungod kay nasandig ang iyang lawas paingun sa tuo nga bahin.
Matod ni Jail Officer 1 Roger Fernandez nga nahinabi sa Superbalita Cebu nga nanawag dayon silag Emergency Medical Services (EMS), apan nalangay, matod pa kinig abot.
Sa paghiling sa iyang lawas gi deklara na kini nga patay na human nga zero na ang mga vital sign niini.
“Sigun sa gisulti sa nag monitor sa CCTV ,nag baktas man kuno ni mga alas 5 na nya igo ra siya naabot, nilingkod siya sa linyahanan sa mga senior. Pag lingkod niya taod-taod kalit ra siyag collapse kay makita man sa CCTV namo sa monitor. So mao na to nadiretso na siya,” matod ni JOI Fernandez.
Sukad sa pagkabilanggo sa iyang anak, kanunay na kini magduawan ug nailhan na nila kay magdala kini og pagkaon.