NIAY good news taliwa sa di maayong mga kalambuan sa coronavirus disease (Covid-19).
Negatibo sa Covid-19 ang 45 ka mga swab sample nga gi-test sa Vicente Sotto Memorial Medical Center (VSMMC).
Kini maoy gipahibawo ni Gobernador Gwendolyn Garcia sa gipahigayon nga press conference sa Kapitolyo kagahapon, Abril 4, 2020.
Sa maong datos, 23 niini gikan sa probinsya sa Sugbo, 12 sa Dakbayan sa Sugbo, lima sa Lapu-Lapu ug lima usab sa Mandaue City.
Samtang sa lalawigan sa Sugbo, moabot sa 29, 557 ka mga Sugboanon ang padayon nga gi-monitor sa mga hospital ug balay.
Ang 23, 227 kanila gikonsiderar nga Persons Under Monitoring (PUM) o katong mipaubos sa 14 ka adlaw nga mandatory quarantine;94 ang Persons Under Investigation (PUI), 232 ang nakasinati ug influenza like illnesses ug upat ang may Severe Acute Respiratory Infection (SARI).
Matod ni Garcia nga nakita ang pagsaka sa datos tungod sa ulahi nga pag report sa kalungsoran sa gidaghanon sa mga pasyente ug PUM.
Lakip usab ang mga nalista nga pasahero sakay sa mga international flights sa wala pa kini gi ban sa Marso 22, 2020.
Hinuon may 5, 733 na ka mga Sugboanon nga gawasnon na sa 14 ka adlaw nga kwarantinas.
Tungod niini, si Garcia nagkanayon nga kinahanglan di pa angay paluagan ang border control ingon man ang mga protocol nga padayon nga gipatuman sa probinsya.
"Let us not be complacent. Instead, let these results challenge us to be even more vigilant. Dili nato pasagdan. Dili ta ko hatah ug lugway, gani labaw pa man ato pa gyud siguruon ug hugtan pa gyud nato ang atong pag bantay ug pakigbisog niining coronavirus", matod ni Garcia.
Sa nasud
Kon puro negative dinhi sa Sugbo, sa kaulohan, mokabat sa 76 ang bag-ong mga kaso sa Covid ang gitaho sa Department of Health (DOH) sa Sabado, Arbril 4, 2020.
Nagdala kini ngadto sa dul-an sa 3,100 ang mga kaso sa nasod. Base sa labing uwahi nga Covid-19 Case Bulletin, ang DOH niingon nga ang kinatibuk-ang gidaghanon sa mga kaso sa nasod naa na sa 3,094.
“As of 4 p.m. today, the Department of Health reports 76 new cases (PH3,019-PH3,094) of Covid-19,” nagkanayon ang DOH.
Sa samang higayon, ang DOH nitaho og walo nga nangamatay sa mga pasyente Covid 19. “This brings the total number of deaths to 144,” matod sai DOH.
Sa samang higayon, ang health department nipahibawo sa pagkaayo sa Covid-19 patients recoveries.“This brings the total number of recoveries to 57,” matod sa DOH.
Mag-ampo
Subay sa maong balita, emosyonal nga nanawagan si Garcia sa tanan nga mga Sugboanon nga makighiusa sa pagyukbo ug pag ampo sa Adlaw sa Pagbendita sa Lukay.
Karon nga nagpadayon nga miatubang ang nasud og ang lalawigan sa krisis tungod sa Covid-19 pandemic.
Karong adlawa, Abril 5, 2020 may misa nga ipahigayon sa Cebu Metropolitan Cathedral magsugod alas otso sa buntag.
Pangulohan kini ni Arsobispo Jose Palma nga tambongan usab ni Garcia ug ubang
kadagkoan sa lalawigan ug dakbayan sa Sugbo.
Iyang gihangyo ang tanan nga motutok sa livestreaming sa simbahan aron nga bisan og anaa sa panimalay mahimong balaan ug mahinungdanon ang maong adlaw.
"Nanghinaot ko nga tanan kalungsoran ug dakbayan nanawagan ako sa mayores ug kapitanes nga ang tanan makig kuyog kanato sa pagabuhaton nga pag ampo sa Mahal nga Birhen aron iya kitang matagaan sa proteksyon. Hinaot unta nga kitang tanan sa tagsa tagsa ka panimalay pinaagi sa telebisyon sa telepono, sa cellphones, sa ipads, kamong tanan maka tune in sa Palm Sunday mass nga pagahimuon sa Cathedral," matod sa gobernador.
Kauban sa pag ampo mao ang pag pangalyupo sa Birhen sa Guadalupe nga maoy patron sa tibuok Probinsya sa Sugbo. (ANV, HDT sa SunStar Philippines)