KARONG adlawa, Abril 5, Dominggo sa Lukay, ang pagbukas sa katapusang semana sa Kwaresma.
Karon untang adlawa ang usa sa labing importanteng adlaw sa pagsaulog sa Semana Santa, diin ang mga Katoliko magpanon sa simbahan kay gawas nga motambog sa mga misa, magpabendeta usab sila sa lukay nga giporma og krus.
Apan karong tuiga, tungod sa coronavirus disease (Covid-19), giluwatan usab ang enhanced community quarantine (ECQ), giwagtang ang mga panagtapok, labina ang mga misa sa mga simbahan.
Giwagtang usab ang naandang mga kalihukan sa simbahang Katoliko alang sa Semana Santa.
Nakapausab kini sa tradisyonal nga pagsaulog sa Semana Santa sa lainlaing pamilya.
Si Andre Dominique Pepito, 21, government employee, niingon nga karong Dominggo sa Lukay mangita lang sila og mga gamayng sanga ug purmahon kini og lukay ug isaulog ang misa online.
"We will have to forego with going to church for now, but we will continue to pray and reflect. For this year's Holy Week, we pray that the spreading of the Covid-19 will stop and that the general welfare of the Philippines and the Filipinos be put to interest," sigon ni Pepito.
Unsay buhaton
Sa laing bahin, Si Fr. Joy Danao, miyembro sa team of pastors sa Archdiocesan Shrine of the Immaculate Heart of Mary sa Minglanilla, Cebu, niingon nga karong tuiga sa pagsaulog sa Dominggo sa Lukay giawhag niya ang matag pamilyang Katoliko nga motambong og misa online.
Giawhag sab kini niya nga maghimo og lukay o bisan unsa nga lunhaw nga dahon ug himuon ang virtual blessing sa lukay. (KFD)