ABLI ang pultahan sa duha ka retiradong Mexican boxing legends nga sila si Marco Antonio Barrera ug Erik Morales sa posibilidad nga mag-away sila'g balik sa ikaupat nga higayon apan sa usa na lang ka exhibition bout.
Nasayod sila si Barrera ug Morales nga pareho nang ning bahar ang ilang abilidad apan malaumon silang modumog lang gihapon ang ilang mga sumosunod kon madayon ang giplanong exhibition bout.
Dili ikalimod nga ang tulo ka mga away sa duha ka banggiitang mga boksidor nahilakip sa labing makapaukyab nga trilogy sa kasaysayan sa boksing sa tibuok kalibutan.
Ang premiro ug ikatulong away nakadawat og Fight of the Year nga mga pasidungog.
Midaog si Morales sa premirong away apan nakabawos si Barrera sa nagsunod nga duha ka mga engkuwentro.
Sa hinapos nga bahin sa ilang boxing careers, aduna mga negusasyon nga magsangka sila sa ikaupat nga higayon sa dili pa sila moretiro apan wala kini nahitabo.
Dili pa lang tantong dugay, nagparang ang laing Mexican legends nga sila si Julio Cesar Chavez Sr. ug Jorge sa duha ka exhibition fights nga parehong gidumog sa Mexican fans.
“That it is a very good idea (doing an exhibitions). I like it because people miss idols that they couldn't see in a ring or on television,” matod ni Barrera sa interbyu sa ESPN Deportes.
"Yesterday, Morales called me and said he had in mind to do this type of exhibition and I told him to count on me."
Gusto ni Barrera nga bisan USA ka exhibition bout, kinahanglang tinud-anay ang ikaupat nga away nila ni Morales aron dili magmahay ang mga tumatan-aw. Giklaro ni Barrera nga wala siya nakauyon sa exhibition bout nila ni Chavez Sr. ug Arce gumikan kay tataw nga naglingawlingaw ra ang duha ka mga boksidor.
“For me, I didn't really like the way things were staged with Arce and Chávez. For me, it would be real boxing and not some show..... not pushing the referee [like in Chavez-Arce], what happened? That is not boxing. We were on a serious level and we have to give people what was lost inside the ring,” pasabot ni Barrera.
Sila si Barrera ug Morales parehong multi-division world champions ug parehong miyembro sa International Boxing Hall of Fame. (ESL)