MARSO 17, 2020 unta ang laing espesyal ug mahuloganon nga adlaw sa kinabuhi ni Jonreil Traya.
Gitakda unta sa maong adlaw ang seremonyas sa ilang graduation.
Apan, tungod sa dakong hulga sa coronavirus disease 2019 kun Covid-19, na-postponed ang usa sa labing mahinungdanon nga kalihokan sa kinabuhi ni Traya.
Siya mitapos og Master in Business Administration sa University of Cebu sa siyudad sa Sugbo.
Gawas niini, usa usab siya ka lisensiyado nga maestro ug part-time nga nagtudlo sa Carcar City College.
Ang lumad nga taga siyudad sa Carcar, nangalagad usab isip konsehal sa Barangay Buenavista.
Si Traya nagtrabaho usab isip Marketing and Advertising Assistant sa SunStar Carcar.
Bisan sa kalayo sa iyang biyahe, wa kini igsapayan ni Traya aron makab-ot ang laing pangandoy sa kinabuhi.
Bisan sa kawad-on, siya nakasugakod tungod sa gabay sa Ginuo, pagsalig ug kompiyansa sa kaugalingon ug gugma ug suporta sa iyang pamilya ug mga higala.
“Ang kawad-on dili babag sa pagkab-ot sa imong kaugmaon ug ang pagka mapahiubsanon maoy sikretong hiyas ug giya sa imong pagkamalampuson,” paambit sa 27 anyos nga ulitawo.
Samtang nagpaabot sila kanus-a mahitabo ang ilang graduation ceremony, gipaagi una nila sa online o virtual graduation ang pagpasalamat ni Traya ug sa iyang mga klasmeyt ngadto sa ilang mga ginikanan, pamilya ug benefactors. (SCG)