SUPERBALITA CEBU

Diola: Tabang intawon!

Mao Diay

Binasi sa Isaias 50:4-7; Salmo 22; Taga-Filipo 2:6-11; Mateo 26:14-27:66

ANG pulong “Osana” gikan sa Hebreo nga gipasabot “tabang intawon”. Makaduha kining gisinggit sa panon sa katawhan sa dihang misulod si Jesus sa Jerusalem. Gisinggit nila kini human sila “mihanig sa ilang mga bisti sa dalan, samtang ang uban namutol og mga sanga gikan sa mga kahoy ug gilatad nila kini sa dalan”. Ug ang mga tawo, sa ilang paghanig sa mga bisti, paglatad sa sanga sa kahoy, ug pagsinggit og “Osana”, miila nga si Jesus maoy katumanan sa gitagna ni propeta Zacarias mahitungod sa hari nga moabot nga mapaubsanon.

Naukay ang tibuok syudad sa Jerusalen sa pag-abot ni Jesus. Nakapatukmod kini sa pangutana: “Kinsa man kining tawhana?” Nahimo siyang subersibo apan dili sa politikanhong pagsabot. Subersibo kay wala na mahimutang ang tibuok Dakbayan. Daw gihatagan ni Jesus ang mga Judio, ilabina ilang kadagkoan, og “last chance” sa pagdawat sa iyang mensahe ug sa iyang pagkatawo.

“Preview” sa umaabot nga pasyon ni Jesus ang iyang pagsakay sa asno. Gipadayon diha sa pasyon ni Jesus ang iyang pagpaubos. Apil niini ang pagbudhi ni Judas, ang paghigwaos sa tanaman, ang pag-atubang sa Sanhedrin, ang paglimod ni Pedro, ang paghukom ni Pilato, ang pagbiaybiay sa mga sundalo, ang dalan sa krus, ang paglansang ug pagkamatay sa krus. Gani miabot ang yugto nga si Jesus, nga gipangayoan og tabang sa pagsulod niya sa Jerusalen, mao nay nangayog tabang: “Dios ko, Dios ko. Nganong gibiyaan mo man ako”. Ang motabang mao na ang tabangunon.

Nalantaw na kining maong kahimtang ni propeta Isaias nga naghisgot sa usa ka tawo kansang mga pulong makapadasig ug makapahupay sa mga nangaluya. Apan siya mismo gitamay, gihapak, ug gilud-an. Taliwala niini misalig gihapon siya sa Ginoong Dios nga naghatag kaniya og determinasyon.

Gipamalandungan ni San Pablo ang maong pagpaubos ug gitandi niya kini sa paghabwa sa kaugalingon. Nagsugod ang paghabwa ni Jesus sa iyang kaugalingon diha sa nahimo siyang tawo, siya nga mao ang Pulong sa Dios. Kini nagdala kaniya ngadto sa pasyon ug krus. Apan sa iyang pagpaubos, sa iyang paghabwa sa iyang himaya, gibayaw siya sa Dios. Gihatagan siya og ngalan labaw sa tanang ngalan nga siya mismo Ginoo.

Dili diay kawang ang pagpangayo og tabang sa Ginoo. Ipalanog nato ang atong mga “Osana” atubangan niining krisis nga atong giatubang. Gihatagan kitag higayon sa Ginoo sa “paghabwa” sa atong mga batasan ug binuhatan nga dili subay sa iyang plano ug kabubut-on. Habwaon na nato atong mga bisyo, atong pagkatapulan, atong mga kasuko nga walay pagpugongpugong, atong mga kasina, ug uban pa.

Pulihan ni nato sa gitawag ni Pope Francis nga “creativity of love” kun ang “pagkamamugnaon sa gugma”. Abrihan lamang nato atong mga mata, kasingkasing, bulsa, ug kamot ngadto sa uban. Gikan sa atong pag-ambit sa pasyon ni Jesus, kita usab mabanhaw uban kaniya.

Andam na ba kita?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph