DILI kini ang dapat mahitabo karong panahona samtang nagkaanam ka taas ang gidaghanon sa mga biktima sa coronavirus disease (Covid-19) sa atong nasud ug sa tibuok kalibutan.
Nagpagawas sa kasuko ang atong Presidente Rodrigo Roa Duterte sa usa ka abogado nga si Chel Diokno sa dihang iyang gi-ataki ang higpit nga balaod sa atong presidente ang enhanced community quarantine (ECQ) kun diin matud pa sa maong abogado, usa kuno sa pagsupak sa human rights, kun tawhanong katungod.
Sa dihang gibalikan siya sa atong presidente dala ang yaga-yaga nga magpakahilom tungod kay midagan sa pagka senador apan wa mudaug, tungod sa kadako og ngipon, mibalos ang maong abogado nga concerned lang daw siya sa iyang kliyente nga hapit na mamatay sa gutom tungod sa kadugay daw sa rasyon gikan sa atong gobyerno.
Kining gibuhat ni Diokno, walay kalainan sa mga sa human rights lawyers nga gisulsulan ang mga sakop sa Kadamay nga gipagawas aron magsinggit-singgit sa pagpangita og rasyon.
Kining mga tawhana kung gitabangan pa ang atong mga frontliners aron madali ang pagpangandam sa mga rasyon nga ilang gipangayo? Mas maayo pa kay sa magpunay og samok-samok ug mosaway.
Walay gipili ang presidente, kay bisan si Manuelito Luna nga maoy nangulo sa Philippine Anti-Crime Commission (PACC) gipalagpot, tungod kay gipaimbestigahan si Vice President Leni Robredo nga nag-solicit sa mga pribadong negosyante aron lang aduna’y ikatabang sa mga frontliners nga gisugal ang ilang kinabuhi tungod niining atong mangilngig nga trahedya.
Hinuon mora'g lain paminawon nga ang atong gobyerno mangayo og tabang gikan sa atong mga pribadong sektor, pero sa ngalan nga wa kita’y balaod nga nagdili niana, dapat dili hilabtan, pero ang taphaw nga katarungan sa abogado nga si Manuelito Luna, nakig-kompitensiya daw ang bise presidente sa atong gobyerno.
Karong panahona, magtinabangay dili mag-atakihay kay dili tiaw kining dakong problema nga atong giatubang, magpasalamat kita sa Pilipinas kay wala gani moabot pa sa 300 ang biktima sa Covid-19 kon itandi sa ubang mga nasud sa kalibutan.
Sa nasud Italya nga nagpasagad ug wala hatagi og dakong pagtagad ang pagsulod sa Covid-19, miabot na sa 16,181 ang nangamatay hangtud kagahapong adlawa, sa Espanya, 11, 643, sa America mga 9,454 hangtud karon, Papua New Guinea ug Timor Leste ang tagsa og patay hangtud ning adlawa.
Dili karon panahon sa pamolitika, unta, kung tarong pa og utok kining mga oposisyon tungod kay kabahin man kita niining gobyernoha, tabangan nato ang atong presidente. Magtinampohay ta aron masulbad ang problema nga unta gamay lang ang casualty sa Covid-19 sa atong nasud.
Gumikan kini sa istriktong pagpatuman sa atong kagamhanan, unya nanang politika pag-abot sa iyang panahon. Kung wala naman lang moy ikatabang? Mas maayo pa’g magpakahilom nalang kaysa magpunay og saway.