DILI na gikinahanglang amyendahan sa lokal nga gobyerno ang unang executive order sa liquor ban nga gipaguwa ni Digos City Mayor Josef Cagas nga magsugod alas 5 sa hapon hangtud alas 8 sa buntag.
Sumala ni Cagas human gimando sa Regional Inter-agency Task Force Covid-19 nga himoong 24 oras na ang liquor ban lukop Davao Region, ipatuman na sab kini sa dakbayan sanglit sakop sila sa Davao Region.
Matod sa mayor nga angayang sundon kun unsa ang gipaguwang mando gikan sa Regional Task Force Covid-19 nga gipamunoan ni Davao City Mayor Sara Duterte-Carpio.
Hinuon, giklaro sa mayor nga wa’y angayang kabalak-an ang mga molupyo gikan sa ubang dapit sa Davao del Sur sanglit makasulod gihapon sila sa dakbayan human aduna na sila’y kasabutan sa League of Municipalities of the Philippines (LMP) sa Davao del Sur.
“Makasulod man gihapon as long as naa sila’y identification card kung wala sila’y quarantine pass, pero kung pwede lang angayan nga magpondo gyud sila sa balay gawas kung importante kaayo ang ilang lakaw,” asoy ni Mayor Cagas nga gihinabi sa SunStar Superbalita sa telepono.
Sa datus sa City Health Office (CHO) niadtong Sabado, Abril 4, 2020, anaa na sa 11 ang patients under investigation (PUIs), duha ang naadmit ug siyam ang gipailawom sa home quarantine.
Mokabat sab sa 31 ang persons under monitoring (PUMs) ug usa ang kumpirmadong nakarekober.
Wala’y bag-ong kaso nga natala sa dakbayan human unang gibutyag sa mayor nga hinay-hinay ng nahanaw ang kagaw sa lugar.
Tungod niini padayong giawhag ni Mayor Cagas ang publiko nga motuman sa ECQ aron wa na’y matakdan sa Covid-19 sanglit gisugdan na nila pag-apod-apod ang tabang sa mga barangay.
Mismong ang mayor ang nangunay paghatod sa tabang alang sa mga molupyo sa Barangay San Roque ug Lungag niadtong Sabado aron masigurong wa’y pamilyang mabiyaan.