GUMIKAN sa gipatumang regional lockdown, 218 ka mga pasahero ang na-stranded niadtong Abril 2, 2020 sa Barangay Pasian, lungsod sa Monkayo, partikular sa utlanan sa Davao Region ug Caraga Region.
Ang maong mga pasahero matud pa mga trabahante sa Siyudad sa Davao nga gustong manguli sa tagsa-tagsa nila ka mga probinsiya gumikan sa hulga sa Covid-19.
Gikabutyag nga sa 218 ka mga pasahero, 144 kanila pulos taga Agusan del Sur, 23 niini ang taga Agusan del Norte, 33 ang taga Surigao del Sur, 12 ang taga Surigao del Norte, lima ang taga Dinagat Island ug usa ang taga Misamis Oriental.
Sumala pa nga aron masolusyunan ang problema sa maong mga pasahero, personal nga giadto ni Governor Jayvee Tyron Uy ang nahimutangan sa maong mga pasahero ug gisusi ang kahimtang sa matag usa.
Matud pa nga nasuta ni Governor Uy nga delikado ang kahimtang sa maong mga pasahero ug posibleng nakahatag og kabalaka sa mga tawo ning probinsiya ang pagpondo sa maong mga pasahero sa utlanan, hinungdan nga nakigsabot ang gobernador sa mga LGU nga nasakupan sa maong mga pasahero aron nga sila makapauli.
Tungod sa maong pakigsabot nga gihimo ni Governo Uy uban sa mga personahe sa LGU Davao de Oro, mga personahe sa PPO ug AFP lakip ang BLGU Pasian, malampusong nakauli sa tagsa-tagsa nila ka mga probinsya ang maong mga pasahero.