HUGTANON nga gipanid-an karon sa Department of Health (DOH) ang 29 ka mga pulis sa Soccsksargen nga gikonsidera nga persons under monitoring (PUMs) ug patients under investigation (PUIs).
Kasagaran kanila mga frontliners nga natumbok nga dunay sintomas sa coronavirus disease (Covid-19).
Ang usa sa mga pulis dunay travel history sa Manila nga gitumbok nga PUI nga naka-self quarantine ning kasamtangan diin ang 28 sab nga pulis gipailawom sab sa mandatory 14-day home quarantine.
Gipamahayag ni Lieutenant Colonel Lino Capellan, ang tigpamaba sa Police Regional Office (PRO) sa rehiyon, nga ang 29 ka mga pulis nadestino sa City, Provincial Police Units, National Units ug Regional Headquarters.
Gikumpirma sab ni Capellan nga dunay 14 ka mga pulis sa rehiyon nga mga PUM ang naka-kompleto na sa ilang 14-day quarantine niadtong miaging semana.
Hugtanon sab nga gi-monitor ang 200 ka mga pulis nga nagbantay sa mga border checkpoints sa rehiyon.
Gikanayon ni Capellan nga dako ang posibilidad nga matakdan sa Covid-19 ang mga frontliners nga kapulisan bisan kompleto pa sila sa mga personal protective equipments (PPEs).