Naninda og marijuana atol sa ECQ, napatay

MENTERYO ang napadulngan sa usa ka gituohang notado nga drug pusher kinsa giingong kawatan, tulisan ug tig-carnap sa mga motor sa area of responsibility (AOR) sa San Pedro Police Station.

Kini subay sa gibutyag sa kapulisan sa San Pedro Police Station nga gipangunahan sa hepe nga si Police Major Jack Tilcag human sa ilang gihimong drug bust batok sa suspek nga si Alexander Impas, alyas Paw-Paw, 24-anyos, residente sa Lower Madapo, Barangay 8-A, Davao City, ala 1 sa kaadlawon, Sabado, Abril 4, 2020.

Giingon nga nakig-transak ang suspek sa nagtakuban nga pulis nga mobaligya og marijuana, ug sa dihang gitunol na ang salapi kalit midagan ang suspek ug mibunlot og usa ka .38 nga revolver.

Gilayong naniyutralisa sa kapulisan ang suspek hinungdan sa kamatayon niini, samtang nakuha ang mga ebidensiya sa iyang posisyon.

Sumala sa kapulisan nga notado nga drug pusher ang suspek diin giingong kawatan, tulisan ug tig-carnap pa gyod kini og mga motor sa ilang lugar.

Sumala sa kapulisan nga bisan gipatuman ang enhanced community quarantine (ECQ) wala gihapon nagduha-duha nga mibaligya ang suspek og ilegal nga druga nga miresulta sa iyang kamatayon.