MATI. Miabot na sab ang usa ka "'perennial problem" sa Balite Bay sa Mati City, Davao Oriental diin tinuig nga mahitabo ang "red tide" sa maong dapit. Subay sa Shellfish Bulletin No. 08 series of 2020 nga adunay petsa Abril 2, 2020 sa Bureau of Fisheries and Aquatic Resources (BFAR), nahilakip ang Balite Bay sa kaso sa red tide uban sa Dauis, Panglao Island sa Bohol, lakip niini ang mga baybayon sa Tagbilaran City sa samang probinsya, Lianga Bay sa Surigao del Sur, ug Ormoc Bay sa Ormoc City sa Leyte. Nagpahimangno ang awtoridad nga di una mokaon og mga kinhason gikan sa nasampit nga mga dapit. (Hulagway gikan sa CIO-Mati)