GIPANEGURO ni Cebu City Mayor Edgardo Labella ang iyang suporta ngadto sa kapulisan, mga sundawo ug force multipliers sa iyang pagduaw sa utlanan sa Dakbayan sa Sugbo nga gibantayan niini.
Sa iyang paglibot, nangtunol si Labella og mga pagkaon, face shield, alcohol ug daghan pang uban.
"Salamat sa inyong gipakita nga pasyensiya. Gusto nakong ipasalig kaninyo nga si Edgar Labella, ang inyong mayor sa dakbayan, mga konsehal ug Colonel Hector Grijaldo, kanunay nga nagpaluyo kaninyo," sulti ni Labella kanila.
Ang mayor niawhag sa mga frontliner nga patas-an ang ilang pasensiya sa pag-atubang sa mga tawo nga mosulod ug gawas sa border sanglit matag karon, kasuk-an sila sa mga tawo, labina sa mga public official.
"Una sa tanan, salamat kaayo sa inyong gipakita nga kadasig. Kahibawo ko nga dili sayon ang inyong trabaho. Usahay makasab-an mo sa ordinaryong tawo, usahay makasab-an mo og opisyal sa gobyerno," dugang sa mayor.
Kini human gipakanaog sa pulis ang mga sakay sa bus sa boundary sa Cebu City ug Talisay City nga paingon nga mosulod sa siyudad.
Kauban ni Labella sila si Councilors Dave Tumulak, Joel Garganera, City Administrator Floro Casas Jr., City Attorney Rey Gealon, DPS Chief Atty. Jigo Dacua ug mga kawani sa City Hall. (PAC)