PAGHATAG og bili sa kinabuhi maoy sentro nga mensahe ni Cebu Archbishop Jose Palma sa iyang wali sa misa sa Palm Sunday sa Cebu Metropolitan Cathedral sa dakbayan sa Sugbo kagahapon, Abril 5.
"Kining tungora, panahon sa Covid-19, unta we should be serious in giving value to our life. That's why both civil authority and all people of good will would remind us to do outmost best that we preserve this life nga gihatag ni Lord," tipik sa wali ni Palma.
Dugang usab niya nga angay mamalandong sa kabililhon sa kinabuhi sanglit anaay uban nga gahi og ulo nga dili mosunod sa social distancing ug mosupak sa gipahigayon nga enhanced community quarantine (ECQ).
Ang Palm Sunday ang sinugdanan sa pag-obserbar sa Semana Santa diin benditahan ang mga lukay apan tungod sa padayon nga hulga sa Covid-19, igo lang kini bendisyonan pinaagi sa pamulong.
Saysay ni Palma nga angay usab daygon ang frontliners kinsa nirisgo sa ilang kinabuhi aron sa kaluwasan sa tanan. Siya nag-ampo nga ang sakripisyo sa front liners dunay padulngan.
"Let's appreciate the sacrifices of people that we may have safety, that we thank God that we are not affected by Covid." dugang ni Palma.
Nagpasalamat usab si Palma sa mga lider nga giuna gyud ang mga tawo diin gipangunahan ug nimando alang sa kaayohan sa mga tawo. Kanselado na ang mga misa tungod sa Covid-19, iyang giabisohan ang mga tawo nga motan-aw sa livestreaming sa mga misa nga anaa sa social media sa lainlain nga mga simbahan sa pag-obserbar ning Semana Santa. (JCT)