ANG simbahang Katoliko pinaagi kang Archbishop Jose Palma sa Artsidiyosisis sa Sugbo nipalanog sa usa ka hiniusang pag-ampo, pagpakgang sa padayong pagkuyanap sa Covid-19.
Mao ni ang sentro sa kalihukan kagahapon, Abril 5, nunot sa pagbukas sa daghang gimbuhaton sa Semana Santa. Ang mga pag-ampo gipalanog atol sa Santos nga Misa nga gidumala ni Palma didto sa Cebu Metropolitan Cathedral. Sa santos nga misa nitambong sab ang gobernador sa Sugbo, Gwen Garcia.
Sa katapusang bahin sa misa, ang gobernador nipalanog sab sa iyang mga pag-ampo alang sa mga Sugboanon ug sa katawhan sa tibuok kalibutan nga padayong gihasi ning makamatay nga virus. Gawas sa simbahang Katoliko mao sab ni ang gibuhat sa ubang relihiyon kauban ang mga tawo nga ilang gialagaran. Ang katawhan sa tibuok kalibutan nag-ampo sa Ginuo sa pagtapos na ning makalilisang pagsulay.
Sa kasamtangan di nato kalimtan sa pag-ampo sa kaluwasan ang medical frontliners ug ubang mga tawo nga nakigbisog pagsanta nga kini di na makakuyanap pa. Ang mga pulis, sundalo, bombero, jail guards, tanod, barangay health workers (BHW) ug daghan pa, nga way maayong kinatulgan mapatuman lang ang mga lagda pagbatok sa Covid-19.
•••
Sa economic frontliners sama sa mga tindera sa mga supermarket, grocery, tindahan sa kamerkadohan, business process outsourcing agents, pharmacists, apil na ang mga money remittance.
Matod sa akong higala nga si Yurideimus Arceño, kinsa nagdumala og pipila ka branches sa usa ka money remittance company, ang nagpahuway nalang karon mao ra kadtong mga mabdos.
Kini tungod sa dakong panginahanglan sa salapi sa atong mga kaigsuonan ilabi na diha sa probinsya. Sa pikas nga bahin, malipayong gipahibalo ni Konsehal Arvin Fiel Abing sa Barangay Maribago, Lapu-Lapu City nga nauyonan sa miaging regular session ang iyang gipalabang nga resolusyon nga maghatag og hazard pay sa ilang mga tanod, BHW, emergency response team, garbage collector ug staff sa barangay ubos sa pagpangulo ni Kapitan Russel Abing.
Tukma ug haum kaayo ni nga lakang nga angay sundon sa ubang barangay, munisipyo ug siyudad. Kanus-a pa man ta manghatag? Labi na niadtong duna gyuy ikahatag.