KAGAHAPON, Abril 5, Palm Sunday o bendita sa lukay, mao ang sinugdanan sa katapusang semana sa Kwaresma. Ang subo nga palandungon mao nga magsaulog kita sa Semana Santa atol sa hulga sa Covid-19.
Gipatuman karon ang enhanced community quarantine (ECQ) dinhi sa siyudad ug tibuok lalawigan sa Sugbo. Busa, imbis nga mamalandong, ang mga tawo nagpalandong na lang kay di na pagawson sa ilang mga panimalay.
Sanglit duna may liquor ban sa siyudad sa Sugbo, nangreklamo na ang mga palainom.Tungod niini, daghan ang niboluntaryo sa mga Siyete Palabras nga maoy mibatbat sa ikalimang mga pulong nga gilitok ni Hesukristo didto sa krus- "Giuhaw ako" (John 19:28).
•••
Gipatuman karon ang lagda nga kinahanglang magsul-ob ang mga tawo og face masks kon migawas sa panimalay. Di kinahanglan nga kadto gyung medical grade masks sama sa N95 nga gitagana alang sa frontliners sama sa doctors ug nurses.
Mahimong himuon nga mask ang bisan unsang klase sa panapton. Ang importante nga matabunan ang baba ug ilong nga maoy agianan sa coronavirus. Usa kini sa mga paagi aron di mokatap ang coronavirus disease 2019 (Covid-19).
Ning atong pagsulat, kapin na sa usa ka milyon ka mga tawo ang konpirmado nga gitakboyan sa Covid-19 sa tibuok kalibotan. Sa Pilipinas, 3,094 ang positibo ug 144 ang nakalas samtang 57 ang nangaayo.
•••
Kitang tanan nangandoy nga maundang na kining Covid-19 aron mahibalik na sa normal ang atong inadlaw nga panginabuhi. Makalitok na unya kita sa ikaunom nga mga pulong ni Hesukristo didto sa krus - "Natapos na" (John 19:30).
Ang tanan anaa sa atong mga kamot. Busa manghugas gyud ta pirmi sa atong mga kamot. Ug magpasalamat kita sa frontliners. Di kay i-discriminate na hinuon. Sabyagan pag disinfectant.
Ilang gisugal ang ilang kinabuhi alang kanato. Gani dunay mga grupo nga naghimo og mga personal protective equipment alang kanila sama sa All-Terrain Medical Relief Organization didto sa Central Command ug sa Rotary Club of Metro Cebu didto sa Basilica Minore del Sto. Niño.