Editoryal: Bag-ong Semana Santa

Editorial Cartoon by Ariel Itumay
Editorial Cartoon by Ariel Itumay

LAHI na kaayo ug sa unang higayon gikan sa atong namat-an nga kahayag ug buot, ang pag-obserbar sa Semana Santa ning tuiga opisyal nga nagsugod kagahapon, Dominggo, Abril 5, tungod sa pagtumaw sa Coronavirus disease 2019 (Covid-19) human gidili ang panagtapok tungod sa enhanced community quarantine (ECQ).

Nawala ang kaalegre sa Bendita sa Lukay nga nagtimaan sa pag-abli sa balaang kuwarisma ug ang krus nga lukay atong pagahipuson sulod sa usa ka tuig sa pagtuo nga pag-iway sa mga dautang espiritu ug paghangop sa grasya bisan wala kini gimando sa Simbahang Romano Katoliko.

Ug taliwala sa mga kahingawa sa mga magtutuo, si Msgr. Joseph Tan, media liaison sa Archdiocese of Cebu, nipasabot nga ang esensiya sa Palm Sunday o ang Bendita sa Lukay, dili ang lukay nga usa lang ka abag sa sacramental ug lahi sa sacrament o sakramento sa pagtuo.

Dugang ni Tan, ang sacramental nagpasabot sa relihiyusong mga butang nga gigamit alang sa pag-baga sa pag-ampo samtang, ang sacrament nagpasabot nga dili lang mga relihiyusong butang apan ang presensiya sa Ginuo diha sa grasya sa kasaulogan.

Tungod niini, dason niya, ang sacramental o abag lang dili kaayo importante kon itandi sa sacrament mismo.

Si Tan nagkanayon nga ang importante sa Palm Sunday mao ang presensiya mismo sa Ginuo, ug pakapin ra ang pagbendita sa lukay nga nagpahinumdom sa malampusong pagsulod ni Hesu Kristo uban sa mga kabus ug dinaugdaog ngadto sa Jerusalem, dapit lang sa mga hamili sa sosyodad.

Bisan sa dakong kabag-ohan, magpadayon ang atong pag-obserbar sa Semana Santa isip importanteng tulumanon ug sentro sa pagtuong Kristiyanismo. Mas ipatunhay nato ang gahom sa hiniusang pag-ampo sa pagsumpo sa Covid-19.

Way imposible ni Kristo nga naghimo og daghang milagro atol ning panahona sa kasaysayan sa pagtuo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph