ATOL sa Northern Mindanao Task Force for Covid-19 online press conference niadtong adlawng Biyernes, April 3, 2020 namahayag si National Economic Development Authority (NEDA-10) regional director Mylah Faye Cariño nga di mabalaka sa suplay sa pagkaon dinhi sa Northern Mindanao.
Kini gumikan kay daghan ang nangabot sa rehiyon nga suplay sa pagkaon.
Gibasihan ang report gikan sa Mindanao International Container Terminal (MICT) sa lungsod sa Tagoloan nga duha ka barko gikan sa nasud sa Vietnam ang nagdeliver ug 4,000 metric tons nga bugas-humay niadtong Marso 31 ug laing 1,350 metric tons niadtong Abril 1.
Dugang ni Cariño nga gawas sa mga delivery nga bugas, ang mga barko naa'y inadlaw nga delivery para sa tibuok Mindanao nga mga utanon, produktong karne, ug uban pang klase-klase nga pagkaon.
Ang mga produkto nga regular nga gideliver sa mga barko ngadto sa lain-laing lugar mao ang pinya, mangga, saging, processed nga mga karne, kalamansi, kamote, sayote, chinese pechay, durian, nangka/langka, lanzones, kapayas, kalabasa, ug patatas.
Ang produkto sab gikan sa rehiyon sama sa Del Monte ug Nestle ang ga-export sab og raw materials for processing.
Samtang ang Gama Foods pud ang ga-export ug mga produktong manok ngadto sa Middle East.
Dugang ni Cariño nga dili lang kaayo mag panic buying gumikan kay kanunay ang suplay sa pagkaon dinhi sa rehiyon.
Sa laing bahin ang buhatan sab sa Department of Agriculture (DA)-Northern Mindanao nagpadayon sa pagpang-apod og mga liso o binhi sa mga utanon.
Adunay 300 ka pakete nga mobalor kini og P52,000 ang gitunol ngadto sa Provincial Agriculture Office sa Misamis Oriental kini aron ang katawhan samtang nagpuyo sa ilang panimalay adunay kalingawan nga matanom sa ilang nataran kay ug magrabe ang kaso sa Covid-19 adunay manubo ug ma harvest gawas sa ilang panimalay.