KON calamity funds ang hisgutan dunay igong pundo ang lalawigan sa Misamis Oriental diha sa pagpakigbatok sa Covid-19.
Gipaabot ni Atty. Jeffrey Saclot, ang gitahasang tigpamaba sa Misamis Oriental Covid-19 Response nga dili kinahanglan sa lalawigan ang supplemental budget gumikan kay ang pundo sa kalamidad igo pa kaayo ug nakaandam kini kung mograbe ang kasot.
Gipasalamatan ni Saclot nga sa pagkakaron walay natalang positibo nga kaso sa Covid-19 dinhi sa lalawigan ug ni-anam kaubos ang kaso sa patients under investigation nga karon naka-home quarantine.
Apan giklaro niini nga karon nga ubos sa general community quarantine ang lalawigan, ang mga barangay ug munisipyo nakahatag pa og ayuda sa ilang mga residente ug kung nagkinahanglan sila og suporta sa lalawigan anaa andam mosapnay kanila.
Matud ni Saclot nga pokos ug prayoridad ni Emano sa pagkakaron nga mapugngan kini nga sakit ug dili na modaghan pa hinungdan giprayoridad niini nga mahatag ang panginahanglanon sa mga frontliners.
Gipaningkamotan sa Kapitolyo nga makahatag og mga personal protective equipments (PPEs), disinfectant misting tents alang sa checkpoints, alcohol, face mask, face shield ug uban pa ngadto sa mga frontliners ug gani nanghimo na ang mga empleyado niini.
Libre usab ang pamahaw, paniudto, panihapon sa mga frontliners diha sa mga border checkpoint nga gitubag sa probinsya.
Matud ni Saclot nga walay abiso nga ipaubos og enhanced community quarantine ang lalawigan.
"So far dili kailangan og enhanced community quarantine ang MisOr ang enhanced man gud ayha nana siya kung naay significant numbers of covid positive cases," matud ni Saclot ug midugang nga moabot ang panahon nga mopaubos gyod og enhanced ang lalawigan.
"Moabot man gyud ta sa enhanced community quarantine kung dili na ma control ang increase sa covid. So far we are very thankful nga nagamay, nag decrease and that's a very good development kung ang mga tao motuman lang gyod sa order sa atong Gobernador mo decrease," matud ni Saclot.