MOST Wanted ug kauban niini patay atol sa engkwentro sa kapulisan sa Sitio Latasan, Barangay Labogon, Mandaue City alas 8:50 sa gabii sa Dominggo, Abril 5, 2020.
Giila ang usa nga si Allan Ouano, taga Sitio Cardava, Barangay Basak, Mandaue City, usa sa top 10 most wanted person sa rehiyon. Si Ouano usa ka inilang drug personality ug adunay warrant of arrest alang sa murder, frustrated murder, homicide ug gun-for-hire nga mga kaso.
Apan ang kauban niini wala pa mailhi, diin nagsul-ob og puwa nga T-shirt ug short pants.
Sigon sa inisyal nga imbestigasyon, nakadawat ang Basak Police Station og taho gikan sa usa ka concerned citizen nga adunay duha ka armading lalaki sa ilang lugar.
Daling girespondehan sa kapulisan ang maong alarma.
Pag-abot sa kapulisan sa maong lugar, nipabuto dayon ang duha ka suspek hinungdan nga mipabuto sab ang mga pulis.
Daling girespondehan sa Barangay Ibabao Medical Team ang mga mamumuno dala ang ambulansya.
Sa pag-assess nila sa mga lawas niini wala na kini pulso. (KFD)