240K ka beneficiary sa 4Ps nakadawat na sa P6K

File photo.
File photo.

NAKADAWAT na ang 240,952 ka mga benepisyaryo sa Pantawid Pamilyang Pilipino Program (4Ps) sa Central Visayas sa P6,000 nga abag sa gobyerno pinaagi sa Social Amelioration Program (SAP).

Matod ni Department of Social Welfare and Development (DSWD) 7 Assistant Regional Director for Operations Shalaine Marie Lucero nga niadtong weekend nila na-download ang maong kantidad sa cash cards sa mga 4Ps beneficiary.

Ang mga benepisyaryo nakadawat sa maong emergency cash subsidy diin top-op amount kini sa ilang regular nga cash grants ug rice subsidy.

Gipasabot ni Lucero nga gi-top up ra nila ang P4,650 gikan sa regular grant ug rice subsidy nila nga P1,350.

Sumatotal aduna’y 294,186 ka mga 4Ps beneficiaries ang Central Visayas, 263,458 niini ang aduna’y cash cards.

Giuna nila ang aduna’y cash cards tungod kay dali ra ma-download ang kwarta ngadto sa Landbank.

Matod ni Lucero nga gitan-aw pa nila kon unsaon nila pagtunol sa 4Ps beneficiaries sa maong emergency cash grant nga way cash cards.

Mamahimong i-over-the-counter kini sa Landbank o i-house to house nila sa DSWD.

Giklaro usab ni Lucero nga P6,000 matag pamilya ang subsidiya nga alang sa Central Visayas tungod kay gibase kini sa minimum wage sa rehiyon.

Lakip sa mamahimong makadawat niini kadtong giila nga labing kabus nga pamilya uibos sa Listahanan sa DSWD; aduna’y miyembro sa pamilya nga informal economy workers susama sa habal-habal drivers, jeepney drivers, carenderia vendors, ug construction workers; kining low income households ug nahunong ang trabaho tungod kay apektado sa crisis sa Covid-19.

Pamilya ang hatagan niini, ug dili indibidwal, dili sad tanan ang mahatagan niini, matod ni Lucero.

Gibutyag usab ni Lucero nga aduna’y P1 bilyon nga kantidad ang ilang gikatakda nga i-download ngadto sa 30 ka local government units sa Central Visayas nga nisulod na sa ilang Memorandum og Agreement isip deputized sa DSWD nga motunol sa maong hinabang.

Usa sab sa giklaro sa DSWD nga kining Social Amelioration Card, dili kini pwedeng i-download o i-photocopy tungod kay adunay unique nga barcode sa ubos.

Kini nagpasabot nga di mohatag ang DSWD sa SAP nga P6,000 kon invalid ang SAC nga gigamit sa tagbalay.

Ang LGUs mao’y mohatag niini sa matag barangay ug ang barangay officials mao ang motunol niini ngadto sa nalakip sa angay hatagan niini.

Sa Central Visayas, anaa sa 1.3 milyones ang makapahimulos sa maong hinabang sa gobyerno.

Sumatotal, aduna’y 132 ka LGUs ang kinahanglan mosulod og MOA sa DSWD aron mapadali ang paghatag sa hinabang nga alang lang sa Abril ug Mayo.

Duha ka SAC ang ihatag sa pamilya, usa niini kuhaon pagbalik sa barangay aron i-evaluate sa social workers o development workers sa LGUs.

“Tabangi me ninyo pagpili sa angayan makadawat,” hangyo ni Lucero sa mga kapitan sa barangay diin hangtod karon naglibog kabahin sa SAP.

Ang SAP usa ka emergency fund program nga gipasar ubos sa bag-ong balaod nga Bayanihan to Heal as One Act diin tumong niini nga matagaan ang 18 milyones ka pamilya sa nasod nga apektado sa coronavirus pandemic. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph