SUPERBALITA DAVAO

Roldan: Hugo L. 'Dondon' Orcullo Jr.

Nota Bene

KUMUSTA na mong tanan dinha? "Lockdown" pa ba or "knockdown" na sa kalaay, kakapoy sa walay gibuhat, kagutom kay way tabang, kamingaw kay walay ka-estoryang tinuod nga tawo, kaguol tungod kay dili makasuroy kauban sa uyab, ug kalagot kay dili makapaningil sa utang?

Apan kami nga pamilya ni Hugo Lavizores "Dondon o Jerry" Orcullo nagbangutan tungod sa iyang pagpanaw niadtong Abril 2, 2020 sa panuigon nga 66-anyos. Namatay siya didto sa Cagayan de Oro City human sa dugay na kaayo nga balatian nga cancer sa tutunlan.

Tungod sa maong sakit, nawala ang iyang bus-ok nga tingog hangtod nga nikuyanap ang iyang sakit sa ubang parte sa lawas. Ikalima siya sa mga anak nila ni Restituta Lavizores ug Hugo Orcullo, Sr. nga lumad nga taga-Argao, Cebu apan didto na sa lungsod sa Padada, Davao del Sur nanimuyo.

Ang iyang mga igsuon mao sila si Atty. Boy Orcullo, nga nipanaw na sab human sa sobra 15 ka tuig nga "coma" tungod sa "stroke," si Alexander Orcullo ang bantugan nga manunulat ug ekonomista nga nikontra og namatay batok sa rehimen ni Marcos nga maoy bana ni kanhi konsehal Nenen Roldan-Orcullo, si Christopher Orcullo nga kanhi "partner" sa usa ka dako og iladong "accounting firm" sa nasud, si Atty. Bethoveen Orcullo nga kanhi piskal ug nahimong konsehal usab sa dakbayan sa Davao, ug ang kinamanghuran mao si Aida Orcullo-Roldan nga sayo sab namatay.

Dugay ko nang wa makita si Dondon, nga naila nga "Jerry" didto sa CDO human sa dugay nga pagpuyo sa Davao City ug sa Butuan. Sama sa iyang magulang nga si Alex, nahimo sab nga lider si Dondon sa kalihukan nga nakigbatok sa diktadorya. Tungod niini, nabalhog siya sa bilanggoan ug nakasinati'g hilabihang turtyor sa kamot sa mananakop.

Sa iyang pagbalik sa sabakan sa gobyerno, napili siyang kapitan sa Barangay Taguibo, Butuan City diin iyang nakahibalag ang amo ra sab nga silingan og suod nga higala nga si Philippine Army Lt. Alexis Noel Bravo nga "full colonel" na karon og maoy hepe sa Task Force Igacos.

Daghan ang masulti nga maayo kabahin kaniya ang mga suod nga higala ni Dondon samtang anaa puy wa makauyon tungod sa iya kaniadto nga bisyo sa inom. Gisulayan niya ang pagsulod sa politika sa Butuan City apan walay palad kay ika-onse siya sa napulo ka konsehal sa maong syudad.

Busa gitawag siya ni Lt. Bravo nga "Hon. Onsehal." Apan dili malilong sa tanan ang kalig-on sa baruganan ug kalantip sa pangisip ni Dondon sa bisan unsang larangan sa kinabuhi. Human sa Butuan City, nanimpalad siya sa Cagayan de Oro sa larangan sa konstruksyon og "real estate" og nahimong presidente sa Press Club sa CDO sa dugay nga panahon.

Daghan siyang natabangan sa mga proyekto sa grupo ug nahimong inila sa maong siyudad. Gigasahan siya og iyang asawa nga si Gegie Torrefiel nga taga Sulod, Davao del Sur ug duha ka anak nga sila si Vera Dereka ug Sora Dereka. Panaw sa kalinaw, Bay Jerry!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph