SUPERBALITA DAVAO

33 pasahero sa Philtranco nga gi-quarantine, nakauli na

DAVAO DE ORO -- Nakauli na sa tagsa-tagsa nila ka mga puloy-anan ang 33 ka mga pasahero sa Philtranco bus nga naharang sa checkpoint sa Barangay Pasian, lungsod sa Monkayo niadtong Marso 21, gumikan sa gipatumang regional lockdown.

Matud pa nga nahuman ug nakumpleto sa maong mga pasahero ang 14 days nga quarantine period sa probinsiya ubos sa pag-amuma sa Provincial Government kinsa mihatag kanila og suporta samtang gipahimutang sila sa Lamdag Agri-Eco Tourism Farm sulod sa katorse ka adlaw.

Ang maong mga pasahero sumala pa gikan sa nagkadaiyang lungsod gawas ning probinsiya nga diin tulo sa maong mga pasahero taga Davao Oriental, usa ang taga Davao del Norte, onse ang taga Bangsamoro Autonomous Region in Muslim Mindanao, walo gikan sa Soccsksargen ug siyam gikan sa siyudad sa Davao.

Gawas sa gipabaon nga mga pagkaon, gihatagan usab ang usa'g usa kanila og medical certificate nga nagpamatuod nga anaa sila sa maayong kondisyon sa lawas human nga naka-quarantine sulod sa katorse diyas isip usa sa mga precautionary measures nga gilatag sa gobyerno aron nga mabatukan ang pagkuyanap sa coronavirus disease (Covid-19).

Gikalipay usab og dako nga ang duha ka mga patients under investigation nga gilangkuban sa drayber ug usa ka pasahero nga sa sinugdan nakitaan og pipila ka mga sintomas sa Covid-19 apan sa kaulahian nag-negatibo sa sunod-sunod nga test nga gipahigayon. (Dexter T. Visitacion)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph